“Жаҳон чемпионати Бенземасиз қизиқ ўтмайди”

 

19 ноябрь куни Қатардаги жаҳон чемпионати Карим Бенземасиз ўтиши маълум бўлди. «Олтин тўп» соҳиби жароҳати сабаб турнирни ўтказиб юборади. Шунинг учун Карим учинчи жаҳон чемпионатида иштирок этолмайди. Дастлаб у 2010 йилда ЖАРда бўлиб ўтган жаҳон чемпионатини ўтказиб юборганди. Ўшанда Раймонд Доменек ҳужумчини жамоага қабул қилмаганди. 8 йилдан кейин эса Россияда ўтган чемпионатда ҳам иштирок этмади. Карим Мате Валбуэна билан боғлиқ жанжалга аралашиб қолганлиги сабабли, бир неча йилга терма жамоадан четлаштирилганди.

 

Матбуотда бу ҳақда нималар ёзилди?

 

Француз матбуотида Погба, Канте, Кимпембе ва Нкункуларнинг жароҳатларини инобатга олиб, Бенземанинг йўқлиги катта зарба эканлиги ҳақида жуда кўп ёзилди. Амалдаги жаҳон чемпионлари мураббийлар штабида ҳали Бенземанинг ўрнига янги футболчини чақириш имконияти мавжуд.

 

“МахиФоот”: “Бенземани ЖЧ-2022да кўриш ҳақидаги сўнгги умидлар пучга чиқди. Текширув натижасида футболчининг сон қисмидан жароҳат борлиги аниқланган. Бу хабарни ўқиб йиғлагим келади. Франция терма жамоаси турнир бошлангунга қадар яна бир етакчи футболчисидан айрилди. Олдинроқ жамоага Канте, Погба ва Кимпемба ёрдам бермаслиги малум бўлганди”.

 

“Спортс.оранге.фр”: “ЖЧ-2022 бошланиши олдидан Франция терма жамоаси учун катта зарба. Бир неча ҳафта давомида футболчини безовта қилувчи жароҳат бор эди. Бироқ, ундан қутилишнинг иложи бўлмади. Қайғули хабар ҳали ҳам бизни тарк этгани йўқ. Франция ўзининг энг яхши футболчисини йўқотди, гарчи биз охирги лаҳзагача бошқача натижага умид қилгандик”.

 

“Спортс.фр”: “Бенземанинг жаҳон чемпионатида ўйнаш умиди бор эди, лекин у амалга ошмади. 2010 ва 2018 йилларда жаҳон чемпионатини ўтказиб юборган футболчи учун даҳшатли зарба. У камида уч ҳафта майдонга тушмайди. Назарий жиҳатдан Бензема терма жамоада қолиши ва финал учрашувларида иштирок этиши мумкин эди. Дешам жароҳатланган футболчиларни таркибда сақлаб қолишни истамади”.

 

“ЛЪEқуипе”: “Бензема жаҳон чемпионатини ўтказиб юборади. Унинг тикланиши камида уч ҳафта давом этади. Франция жамоасини ҳайратга солган махсус хабар. Канте, Погба, Менан, Кимпембе, Нкунку ва энди Бензема. Бундай хабарлар фонида жамоа қандай ҳаракат қилишини тушуниш керак. Бенземада Платини ва Зидан каби футболчилар билан бир қаторда туриш имконияти бор эди. У битта орзусини амалга оширди ва “Олтин тўп”ни қўлга киритди. Аммо ақл бовар қилмайдиган муваффақиятдан кейин энг даҳшатли жароҳат пайдо бўлди”.

 

Ижтимоий тармоқлардаги мухлислар бир неча гуруҳларга бўлинган. Кимдир Бенземанинг жароҳатидан чин дилдан афсусда, кимдир Франция усиз ҳам барчасининг уддасидан чиқишига ишонмоқда.

 

Эқуилибрио: “Мен бу жаҳон чемпионатини Каримсиз кўришни тасаввур қила олмайман. Бензема, Мане, Салаҳ, Ҳоланд, Доннарумма, Алаба, Аубамеянг, Нкунку ёки Кантесиз жаҳон чемпионати FIFА учун ҳам катта юқотиш. Бу йил “Олтин тўп”га даъвогарлар қаторида бўлган футболчиларнинг тахминан 40 фоизи турнирда иштирок этмайди”.

 

Халандрон: “Погба жароҳат олган, Канте жароҳатланган, Нкунку жароҳатланган ва ҳозир Бензема ҳам шу ҳолатга дуч келди. Дунёдаги энг аҳмоқона чемпионат”.

 

Стурна: “Бенземанинг йўқлиги жаҳон чемпионатини томоша қилишга бўлган барча қизиқишимни ўлдирди. Мен мусобақада ҳеч кимга мухлислик қилмайман”.

 

Этикев: “Карим охирги имкониятини қўлдан бой берганини англаши қийин бўлса керак”.

 

Билаш Банержи: “Ташвишланишга арзимайди. Тўрт йил аввал Франция Бенземасиз жаҳон чемпиони бўлган”.