Роналдунинг испан жамоасига ўтиш эҳтимоли бор
У айни вақтда жаҳон чемпионатига тайёргарлик олиб боряпти.
Криштиану Роналдунинг шов-шувли интервьюсидан сўнг, унинг “Манчестер Юнайтед”даги келажаги катта савол остида қолди. Ҳужумчи ЖЧ-2022 гуруҳ босқичи ўйинларига тайёргарлик кўраётган бир пайтда, унинг вакиллари фаол равишда футболчига клуб излашмоқда. Чунки португалиялик ҳужумчи энди Манчестерда қолиши даргумон. “ЭСПН” нашрининг хабарига кўра, “Манчестер Юнайтед” бош мураббийи Эрик тен Хаг Роналду энди клубда ўйнамаслигини айтган. Португалиялик футболчи фаолиятини давом эттириши мумкин бўлган вариантлардан бири “Реал Мадрид” бўлиб турибди.
Карим Бензема сўнгги дақиқада Франция терма жамоасининг ЖЧ-2022 таркибидан четлатилди. Ҳужумчи чап сонидан жароҳат олган ва уч ҳафтани ўтказиб юборади. Бу ҳужумчининг мавсумдаги бешинчи жароҳати бўлиб, шу тариқа “Реал Мадрид” франциялик футболчига ўринбосар қидиришни тезлаштириши мумкин. Испаниянинг “Спорт” нашри хабарига кўра, Криштиану Роналдунинг атрофидагилар “Қироллик клуби”га уни Мадридга қайтаришни таклиф қилишган.
“Криштиану Мадридга қайтишни хоҳлайди. Унинг “Атлетико”га ўтиши мумкинлиги ҳақида миш-мишлар тарқалган эди. Аммо улар бунчалик қимматга тушадиган трансферни ўз зиммаларига олмоқчи эмас. «Реал Мадрид» ҳозирча жим, аммо Бенземанинг жароҳати янги режаларни тузишга мажбур қилиши мумкин”, — деб ёзади “Спорт” мухбири Луис Мигелсанс. Журналистнинг аниқлик киритишича, Флорентино Перес ва Криштиану Роналду ҳужумчи “Ювентус”га кетганидан кейин ҳам яхши муносабатда бўлиб қолишган.
Шу билан бирга, яна бир шарҳловчи Хосе Феликс Диас Роналдунинг “Сантяго Бернабеу”га қайтиши ҳақидаги миш-мишларни йўққа чиқарди. Унга кўра, “Реал Мадрид” Бенземанинг жароҳатига қарамай, қишки трансфер ойнасида Криштиану ёки бошқа ҳужумчини сотиб олмайди. Франциялик футболчи йўқлигига қарамай, мадридликлар жамоасида битта таниқли ҳужумчи бор бу Мариано Диас. У сўнгги бир ярим мавсумда 16 ўйинда битта гол ва битта голли узатмага муаллифлик қилган.
Мадридга қайтиш Криштиану Роналду учун ажойиб вариантидир. Агар “Реал Мадрид” уни қайтариб олмаса, португалиялик МЛС клуби ёки Саудия Арабистонига кетиши мумкин. Бу ҳақда инсайдер Николо Шира маълум қилган. Бироқ, битта муаммо бор Криштиану Европа қолиб, Чемпионлар лигасида ғалаба қозонишни хоҳлайди.
