“Фақат ғалаба учун жанг қиламан”

 

26 ноябрь куни профессионал боксда ўз фаолиятини давом эттираётган Олимпиaда ва жаҳон чемпиони Баҳодир Жалолов навбатдаги жангини ўтказади. АҚШнинг Калифорния штатида ўтказиладиган бокс кечасида ҳамюртимизга америкалик Кёртис Ҳарпер рақиблик қилади.

 

Жалолов Zamon.uz мухбирининг мазкур жангга қандай тайёргарлик олиб боргани ва бўлажак рақиби ҳақидаги саволларига жавоб берди:

 

“Ушбу жангга тайёргарлик жуда яхши бўляпти. Биз ҳозир Лос Анжелесга келганмиз. Ўн кун давомида Калифорнияда жойлашган ўзимизнинг эски базамизда машғулотларни олиб бордик. Тайёргарлик аъло даражада. Насиб бўлса, йигирма олтинчи куни фақат ғалаба учун жанг қиламан”.

 

Мазкур бокс кечасининг асосий жанги биринчи ярим ўрта вазн тоифасида вакант турган WBC чемпионлик камари учун Режис Прогрейс ва Хосе Сепеда ўртасида бўлиб ўтади.

 

Бундан олдинроқ, Баҳодир Жалолов 15-октабр куни Ливерпулдаги бокс оқшомида жанг қилиши айтилганди. Бироқ, Жалоловга рақиб топилмади ва унинг иштирокидаги жанг бекор бўлди. Боксчи сўнгги жангини июнь ойида ўтказиб, унда бельгиялик Жек Муловайини муддатидан аввал мағлуб этганди. Кёртис Ҳарпер эса охирги марта июль ойида рингга чиқиб, Кристиан Тун устидан ғалабага эришган. Баҳодир Жалолов профессионал боксда ўн битта жанг ўтказиб, уларнинг барчасида нокаут эвазига ғалаба қозонган. Америкалик Ҳарпер йигирма иккита жангнинг ўн тўрттасида муваффақият қозонган бўлса, саккизта жангда рақибларига имкониятни бой берган.