Токаев ва Путин Ўзбекистон билан қандай иттифоқ тузмоқчи?
Қозоғистон президенти матбуот котиби гап аслида қандай иттифоқ ҳақида кетганини очиқлади.
Кеча Қозоғистон ва Россия президентлари Ўзбекистон иштирокида уч томонлама иттифоқни мустаҳкамлаш зарурлиги ҳақида гапирганди. Қосим-Жўмарт Токаевнинг матбуот хизмати ушбу ташаббус тафсилотларини очиқлади.
Токаевнинг матбуот котиби Руслан Желдибайнинг сўзларига кўра, гап газ иттифоқи ҳақида кетмоқда.
“Кремлда Россия ва Қозоғистон президентлари музокаралари давомида Россия, Қозоғистон ва Ўзбекистон иштирокида “уч томонлама газ иттифоқи”ни тузиш ҳақида гап кетганди. Бу Ўзбекистон ва Қозоғистон ҳудудлари орқали Россия газининг транспортировкасига оид ҳаракатларни мувофиқлаштириш мақсадида таклиф қилинди”, – деган Желдибай.
Токаев ва Путин бу бўйича барча томонларнинг манфаатларини ҳисобга олган ҳолда экспертлар иштирокида музокара ўтказиш кераклигини қайд этган.
