Янги тадқиқот: камида 3.6 миллиард одам сув танқислигига дуч келмоқда

 

2050 йилда сайёра аҳолисининг 5 миллиарди сув танқислиги билан тўқнашади. Бу ҳақда Бутунжаҳон метеорология ташкилотининг “Глобал сув ресурслари ҳолати” ҳисоботида сўз боради.

 

“Сўнгги вақтларда иқлим ўзгариши оқибатлари айнан сув ресурслари ҳолатида яққол сезилмоқда: биз интенсив ва узоқ давом этадиган қурғоқчиликлар, экстремал тошқинлар, номутаносиб ёғингарчиликлар ва музликлар эришининг тезлашишига гувоҳ бўляпмиз”, – деган ташкилот бош котиби Петтери Таалас.

 

Унинг сўзларига кўра, бу каби ўзгаришлар иқтисодиёт, экотизим ва кундалик ҳаётнинг барча соҳаларига салбий таъсир ўтказмоқда. Ҳисоботда ҳозирги кунда 3.6 миллиард одам энг камида бир ой сув етишмовчилиги билан тўқнаш келаётгани қайд этилган.

 

2001-2018 йилларда Ер сайёрасидаги барча табиий офатларнинг 74 фоизи сув билан боғлиқ бўлган. 2021 йилда Ернинг катта майдонларида сўнгги 30 йилда кузатилмаган қурғоқчилик юз берган. Масалан, Жанубий Американинг Рио-де-Ла-Плата ҳудудида 2019 йилдан буён барқарор қурғоқчилик кузатилмоқда. Амазониянинг жануби ва жануби шарқи, Колорадо, Миссури ва Миссисипи дарёлари  ҳавзаларида ҳам шундай ҳолатни кўриш мумкин.

 

Африканинг Нигер, Вольта, Нил ва Конго дарёларида сув даражаси 2021 йилда одатдагидан паст бўлган. Россия ва Марказий Осиёнинг айрим минтақаларида ҳам шундай вазият кузатилган.

 

Ҳисобот муаллифларининг фикрича, узоқ истиқболда Бразилиянинг Рио-Сан-Франциско, Патагония, Ганга ва Ҳинд дарёларининг юқори оқими ва АҚШ жануби-ғарбидаги дарё ҳавзаларида сув баланси камайиб боради.