Сенсацион мундиалнинг гуруҳ босқич якунлари

 

Кеча Қатарда бўлиб ўтаётган навбатдаги футбол бўйича жаҳон чемпионатининг гуруҳ босқич ўйинлари ортда қолди. Шу тариқа кейинги босқич йўлланмасини қўлга киритган ўн олтита терма жамоа номи маълум бўлди. Алам ва қувонч кўз ёшлари, кутилмаган баҳслар, рекордлар ва турли хил факт мусобақанинг гуруҳ босқич ўйинларига ўзгача жозиба тақдим этди. Қуйида мундиалнинг энг эсда қоларли вазиятлари ва плей-офф босқичида тўқнаш келадиган жамоаларнинг имкониятлари ҳақида қўшимча маълумотларга эга бўлишингиз мумкин.

 

Мезбонларга хос характер кўрсатилмади

 

Қатар жаҳон чемпионати мезбонлигини қўлгa киритганидан сўнг, мусобақага жуда катта тайёргарлик кўрди. Мамлакат ташкилий ишлар учун мундиаллар тарихида энг кўп пул сарфлаган давлатга айланди. Ўзининг тартиб-қоидаларини жорий этган Қатар якунда кўплаб хорижликларнинг эътирозига сабаб бўлди. Бироқ, якунда бу қарама-қаршиликлар ҳам барҳам топди. Сўнгги маълумотларга кўра, 600 га яқин бошқа дин вакиллари Ислом динини қабул қилди. Мамлакатда миллий урф-одатлар билан биргаликда, диний тарғиботлар кучли давом эттирилмоқда. Бевосита гуруҳ ўйинлари ҳақида гапирадиган бўлсак, “А” гуруҳида Қатар мезбонларга хос ирода кўрсата олмади. Биринчи турда Эквадорда учралган мағлубият яна бир анаъанага якун ясади. Яъни охирги жаҳон чемпионатларининг биронтасида мезбонлар турнирни мағлубият билан бошламаётган эди. Кутилганидек гуруҳда Нидерландиянинг имкониятлари юқори бўлиб чиқди. Эквадор ва Сенегал иккинчи ўрин учун жиддий кураш олиб борди. Қатар эса бу учала жамоага очко улашувчи жамоа бўлиб чиқди. Яна бир қизиқ томони қатарликлар мундиаллар тарихида илк голини киритишга муваффақ бўлди. Мамлакатда футбол бўйича яна талайгина ишлар амалга оширилиши кераклиги яққол сезилиб қолди. Шу тариқа, “А” гуруҳида Нидерландия ва Сенегал термалари кейинги босқичга йўл олишди.

 

Кутилмаганда кутилган ўйинлар

 

Месси учун сўнгги жаҳон биринчилиги дея эътироф этилаётган турнирда Аргентина Саудия Арабистонига кичик ҳисобда имкониятни бой бериб қўйди. Ана шундан кейин мусобақанинг ўша оқшоми ким учундир тантанага айланган бўлса, ким учундир аламли бўлди. Саудия бу ғалабаси билан мундиаллар тарихидаги иккинчи ғалабасини қўлга киритди. Мазкур баҳсдан сўнг арабларнинг мухлислари миллионлардан ошди. Мамлакат раҳбари бу ютуқдан сўнг жамоанинг ҳар бир аъзосига икки ярим миллион евро ва “Rolls-Royce” автомашиналари топширилди. Бу хабар бутун ер юзи бўйлаб миллионлаб ОАВ нашрларида эълон қилинди. Аргентина бўлса, навбатдаги ўйинларни кутишга мажбур бўлди. Ниҳоят кутилмаган cерияга якун ясалиб Месси сардорлик қилаётган жамоа гуруҳда биринчи ўринни қўлга киритди. Тиллардан тилларга достон бўлган саудиялик футболчилар эса биргина ғалаба билан гуруҳни сўнги ўринда якунлади. “Яхши от кейин чопади”, — деган мақол ўз тасдиғини топди. Гуруҳда иккинчи ўрин Полшага насиб этган бўлса, Мексика учинчи ўрин билан кифояланди.

 

“Б” гуруҳи Эроннинг ўз мадҳиясини айтмагани билан эсда қолди. Англиядан йирик ҳисобда мағлуб бўлган форслар кейинги ўйинларда анча ишончли ҳаркат қилди. Иккинчи турда UELS’ни 2:0 ҳисобида ютган Эрон охирги турда АҚШга мағлуб бўлди. Бир ғалаба билан тугаган мундиалдан сўнг жамоа мураббийи ишдан кетмоқчи эканлигини маълум қилди. Англия эса биринчи ўрин билан кейинги босқичга йўл олди. АҚШга иккинчи ўрин насиб этди. Ҳозирча Англия жаҳон чемпионатида мағлуб бўлмаган жамоалардан бири бўлиб турибди.

 

Осиёликлар сизларга ўйинчоқ эмас

 

“Э”гуруҳида Япония фаворитлар орасида олти очко билан гуруҳ пешқадамига айланди. Испанларни иродали тарзда мағлуб этган “самурайлар” яна бир бор мухлисларнинг меҳрини қозонди. Турнир давомида япониялик мухлислар барчага ўрнак бўладиган ишларни амалга оширди. Сабаби улар ўйинлар давомида барча чиқиндиларни тозалаб кетишди. Бу эса охирида бошқа жамоа ишқибозларига ҳам ўрнак бўлди. Немисларнинг биринчи турда Қатардаги чекловларга қарши оғизларини беркитган ҳолда расмга тушгани ижтимоий тармоқларни “ёндирди”. Айнан мана шу хатти-ҳаракат немисларнинг кейинги босқичга чиқолмаганига сабаб бўлгани бот-бот айтилмоқда. Бу биргина ҳолат. Умуман гуруҳ ўйинлари давомида Германия ишончсиз ҳаракат қилди. Асосан ёшлардан таркиб топган Испания эса иккинчи ўрин билан чекланди. Коста-Рика бу сафар ҳайратлантира олмади. Шимолий америкаликлар охирги ўринни банд этди. “Д” гуруҳи вакили Австралия ҳам Осиё жамоалари ичида кейинги босқичга чиққан термага айланди. “Яшил қитъа” вакиллари гуруҳда Франциядан кейин иккинчи ўринни қўлга киритди. Турнир кашфиёти дейилаётган Дания эса мундиални охирги ўринда якунлади. Тунис мусобақани тарк этган навбатдаги Африка жамоаси бўлди.

 

Қариялар ёшларга қарши

 

Ички келишмовчиликлар Бельгиянинг ўйинларига салбий таъсир кўрсатди деган хабарлар ҳамманинг диққат-марказида бўлди. Жамоа аъзоси Кевин Дебрюйни термадаги ички муҳит ва футболчиларнинг ёши катталашиб қолгани сабабли бу мусобақада яхши натижа кўрсата олишмаслигини тан олганди. Якунда ҳам шунақа бўлиб чиқди. “Қариялар жамоаcи” тўрт очко билан турнирни учинчи ўринда якунлади. Канада кейинги мусобақага катта куч тўплаб келишни вада берди. Шу тариқа кейинги босқичда “Ф” гуруҳи шарафини Марокаш ва Хорватия жамоалари ҳимоя қиладиган бўлди.

 

“Г” гуруҳида эса ҳеч қандай кутилмаган натижа қайд этилмади. Фақат биргина Неймарнинг жароҳат олгани мухлисларнинг хавотирига сабаб бўлди. Гуруҳда Бразилия биринчи бўлган бўлса, Швейцария иккинчи жамоа бўлди. Бразилияни охирги турда мағлуб этган Камерун гуруҳнинг учинчи термасига айланди. Сербия эса Европаликларга хос ўйин кўрсата олмади.

 

“Еттилар” ютди 

 

Жаҳон чемпионатининг сўнги гуруҳи ҳам қизғин баҳсларни тақдим этди. Клублар ва терма жамоаларда еттинчи рақамда ўйнайдиган Роналду ва Сон кейинги босқичга муносиб тарзда йўл олди. Гана ва Уругвай адоватлари эса жамоаларнинг турнирни тарк этиши билан тугади. Икки терма ўртасидаги баҳс аслида 2010 йил бошланган. Унда Сурес қўли билан дарвозага кириб кетаётган тўпни қайтаргани, африкаликларнинг гол уролмагани ва якунда Уругвайнинг ғалабаси Ганани кечаги ўйинда янада ғалабага ўч бўлишга мажбур этди. Ўн йилдан ошган бу қарама-қаршилик кечаги баҳсда ҳам яққол сезилди. Шу тариқа мундиал гуруҳ босқичининг охирги ўйинлари кўз ёшлар билан якунланди. Сон қувонч кўз ёшларини тийиб туролмаган бўлса, Луис Суарес энди бошқа мундиалларда ўйнай олмаслигидан аламли кўз ёш тўкди.

 

Мусобақанинг плей-офф ўйинлари бугундан старт олади. Энди ҳеч қайси жамоанинг хато қилишга ҳаққи йўқ. Ким қоқилса, у учун Қатардаги сафар якунланади.

 

Жамшидбек Амиров