БМТ: Табиат билан “тинчлик шартномаси” тузиш вақти келди
Ташкилот жаҳон ҳамжамиятини ушбу шартномага қўшилишга чақирди.
Жаҳон ҳамжамияти табиат асраш билан боғлиқ миллий ҳаракатлар режаларини ишлаб чиқиш, атроф-муҳитни муҳофаза қилиш чоралари вa ривожланаётган мамлакатларни молиявий қўллаб-қувватлашни назарда тутадиган шартнома тузиши керак. Бу ҳақда БМТ Бош котиби Антониу Гутерриш Монреалда биохилма-хиллик бўйича конференцияда сўзлаган нутқида айтиб ўтди.
"Табиат билан тинчлик битимини тузиш вақти келди. Бунинг uchun учта аниқ ҳаракат талаб этилади. Биринчидан, ҳукуматлар молия ва озиқ-овқатдан тортиб энергетика ҳамда инфратузилмагача бўлган барча вазирликлар учун миллий ҳаракатлар режаларини ишлаб чиқиши керак. Субсидияларни қайта йўналтириш; табиатни вайрон қилувчи фаолиятдан экологик ечимларга солиқ олишни ошириш,қайта тикланадиган энергияга эътибор қаратиш, пластмассани қисқартириш лозим.
Иккинчидан, хусусий сектор фойда ва атроф-муҳитни муҳофаза қилиш ёнма-ён бориши кераклигини тан олиши керак. Глобаллашган иқтисодиётимизда бизнес ва инвесторлар дунёнинг ҳар бир бурчагида табиат инъомларига таянадилар.
Учинчидан, ривожланган давлатлар сайёрамизнинг табиий бойликларининг асосий эгаси бўлган глобал Жануб мамлакатларига молиявий ёрдам кўрсатиши зарур. Ривожланаётган давлатлар бу юкни ёлғиз ўзи кўтаришини кута олмаймиз”, — деди ташкилот раҳбари.
БМТ Бош котибининг фикрича, барча мамлакатлар ўз экотизимларини ҳимоя қилиш ва қайта тиклаш билан бирга умумий мақсадларни ҳам қўллаб-қувватлаши керак.
