Андрик ўзи ким?

 

Ҳамма жаҳон чемпионати ҳақида гапираётган бир пайтда Испанияда ақлдан озган трансфер амалга оширилди. 16 ёшли Aндрик учун Европанинг кўплаб топ клублари, жумладан, “Барселона”, “ПСЖ” ва “Челси” курашди. Аммо футболчи “Реал”ни танлади. Фабрицио Романонинг сўзларига кўра, футболчи испанларга 72 миллион еврога тушмоқда. Шундан 60 миллион евро “Палмейрас”га товон пули, яна 12 миллион евро бошқа тўловлардир.

 

Бразилиялик футболчи бир ярим йилдан сўнг, 2024 йилнинг ёзида, 18 ёшга тўлганда “Реал”га ўтади. Унгача у “Палмейрас”да ўйнашда давом этади. “Реал” билан шартнома 2030 йилгача мўлжалланган. Келишув кейинроқ эълон қилиниши кутилмоқда.

 

Клублар ёш футболчи учун қандай курашди?

 

Андрикнинг отаси шу йилнинг ноябрь ойида “Реал Мадрид” базасига ташриф буюриш режалари ҳақида гапирди. “Скй Спортс” журналистининг таъкидлашича, Андрикни “Манчестер Юнайтед” селекционерлари бир неча бор жамоага таклиф қилган. “Барселона” бош мураббийи Хави бу футболчига муҳтож эканини очиқ айтган ва каталонияликлар ҳам унинг отаси билан музокара олиб борган. “О Глобо” хабарига кўра, “ПСЖ” Андрик учун 50 миллион евро тўлашга ва шу билан бирга 15 ёшли Эстевинё учун яна 30 миллион евро беришга тайёр бўлган.

 

Бироқ ёш ҳужумчи “Реал”га ўтади. Кўриниб турибдики, бунда клубнинг бош скаути Ҳуни Калафатнинг хизмати катта бўлган. У Мадридга ўтиш зарурлигига футболчиларни ишонтиришда катта тажрибага эга. Айнан Калафат Винициус ва Валвердени “Реал”ни танлашга кўндирган. Шунингдек, Родригони ҳам 13 ёшида жамоага олиб келган. У шунингдек, “Реал Мадрид” президенти Пересни Маттейс де Лигтни эмас, балки Милитаони сотиб олишга кўндирган.

 

Андрикнинг “Реал”га ўтишига яна бир сабаб Криштиану Роналдуга мухлислиги бўлиши мумкин. Андрикнинг отаси Носса интервьюсида шундай деди: “Ўғлим:” Дада, мен Криштиану каби бўлишни хоҳлайман деди. Андрик, худди Криштиану каби, қийинчиликларда катта бўлган”, — деди футболчининг отаси. Айтганча, Андрик яқинда Роналду услубида голлардан бирини нишонлади.

 

Андрик қанчалик зўр?

 

У эндигина 16 ёшда ва у аллақачон юқори даражасида гол урмоқда. Яқинда “Палмейрас”да ўйнаган энг ёш футболчига айланди (16 ёш, 2 ой ва 15 кун). Кўп ўтмай (2022 йил октабр ойида) у Бразилия чемпионатида гол урди ва 1978 йилдан бери олий лигада энг ёш тўпурарга айланди.

 

Андрик чапақай. У “Палмейрас” билан Бразилия чемпионлигини қўлга киритди.

 

Андрик аллақачон Бразилия чемпионатининг тўлақонли юлдузига айланган. Унинг номи мухлислар томонидан тараннум этилмоқда. Ҳозирда у Бразилия терма жамоасининг ёшлар ва ўсмирлар терма жамоасидан таклифлар олган.