Аргентиналик футболчи учун катта пул сўрашмоқда
У ҳозир жаҳон чемпионатида тўртда гол урган.
Энсо Фернандес Аргентина терма жамоасининг Қатарда бўлиб ўтаётган жаҳон чемпионатидаги етакчиларидан бири. 21 ёшли ярим ҳимоячи турнирда икки марта заҳирадан майдонга тушурилди. У биринчи Мексикага қарши ўйинда гол урди ва Полшага голли узатма берди. Кейинчалик бошқа ўйинларда асосий таркибда туша бошлади.
Айни вақтда трансфермаркт портали томонидан 35 миллион еврога баҳоланган “Бенфика” футболчисига бир қанча топ-клублар қизиқиш билдирмоқда. “Ливерпул” ушбу рақобатда кучлилик қилмоқда.
“Ливерпул” Энсо Фернандесни сотиб олмоқчи
2022 йилнинг ёзида аргентиналик футболчи 12 миллион евро эвазига “Ривер Плейт”дан “Бенфика”га ўтди. Энсо Фернандес клуб билан 5 йиллик шартнома имзолади ва мавсумнинг биринчи қисмида Португалия клуби етакчисига айланди. У 24 та ўйиндан 24 тасида майдонга тушди. Чемпионлар лигасида “ПСЖ” ва “Ювентус”га қарши ўйинларда учта гол урди ва бешта голли узатмани амалга оширди. Жаҳон чемпионатида ярим ҳимоячи Аргентина тарихида Лионел Мессидан кейин майдонга тушган энг ёш футболчи бўлди. Полша билан учрашувда Энcо 21 ёшу 317 кунлик эди.
Ярим ҳимоячига қизиқиш жаҳон чемпионати бошланишидан олдин ҳам кузатила бошлаган. Энсо Фернандесга “Ливерпул”, “Манчестер Сити”, “Барселона” ва “Манчестер Юнайтед” қизиқиш билдирмоқда.
Жаҳон чемпионати бошлангандан сўнг, Энсо Фернандесга “Реал” ва “Ливерпул” яқинроқдан қизиқиш билдираётгани маълум бўлди. “Марcа” нашри хабарига кўра, мадридликлар футболчини Жуде Беллингемга муқобил ўйинчи сифатида кўрмоқда. Аммо 100 миллион евролик нархдан қўрқишмоқда. Фабрицио Романонинг айтишича, “Бенфика” Фернандесни қишда сотишга тайёр эмас. Таъкидланишича, футболчининг товон пули 120 миллион еврони ташкил қилади.
“Ливерпул” футболчини сотиб олиши аниқ бўлиб бормоқда. “ЭСПН” мухбири Густаво Жаррохнинг хабар беришича, “мерсисайдликлар” футболчи билан шахсий шартларни муҳокама қилмоқда. Томонлар келишувга жуда яқин. “Ливерпул” 120 миллионлик евролик товон пулини тўламоқчи. Португалиянинг “Реcорд” нашри ҳам худди шундай маълумотни тасдиқлади. Уларнинг ёзишича, “Ливерпул” аллақачон Энсо билан дастлабки келишувга эришган. Агар трансфер амалга ошса, шартноманинг 25% “Ривер Плейт”га тушади.
Агар бу амалга ошса, Энсо Фернандеснинг “Ливерпул”га ўтиши инглиз клуби учун рекорд даражадаги сумма бўлади. “Мерсисайдликлар” ҳозиргача Виржил ван Дейк (84,65 млн евро) учун “Саутгемптон”га энг кўп пул тўлаган. Аргентиналик футболчи Клопп жамоасида Алекс Окслейд-Чемберлен, Кертис Жонс, Наби Кейта, Тиаго Алкантара, Жордан Ҳендерсон ва Жеймс Милнер билан рақобатга киришади. Эслатиб ўтамиз, ёзда Кейт, Милнер ва Окслейд-Чемберленнинг шартномалари тугайди. Бу эса рақобатни заифлаштириши ва янги келган футболчининг таркибда тезда ўз ўрнини топишига ёрдам бериши мумкин.
