Мундиалларда бошқа кўриниш бермайдиган юлдузлар
Zamon.uz уларнинг барчаси ҳақида батафсил маълумотларни тақдим этади.
Лионел Месси ЖЧ-2022 финали унинг фаолиятидаги сўнги жаҳон чемпионати ўйини бўлишини аллақачон тасдиқлаган. Катта эҳтимол билан, замонавий футболнинг яна бир супер юлдузи Криштиану Роналду билан бирга терма жамоалар учун асосий бўлган турнирда иштирок этмайди. Афсуски, Месси ва Роналду даври тугаяпти. Аммо, 2022 йилдан кейинги жаҳон чемпионатида бошқа кўплаб топ-футболчилар ўйнамаслиги янада ачинарли. Айнан шунинг учун уларга Қатарда ўтаётган мундиал сўнгги имконият ҳисобланарди.
Аргентина: Николас Отаменди, Анхел Ди Мария, Папу Гомес
Нафақат Месси, балки Аргентина терма жамоасининг камида яна уч нафар футболчиси жаҳон чемпионатлари билан хайрлашиши мумкин. Агар Лео ҳозир 35 ёшда бўлса, Отаменди, Ди Мария ва Гомес 34 ёшда. Боз устига, уларнинг барчаси 1988 йилнинг февраль ойида туғилган, шунинг учун 2026 йилги жаҳон чемпионатида уларнинг ҳар бири 38 ёшга тўлади.
Португалия: Пепе
Темир ўйинчи деб аталадиган Пепе ҳам яқин йилларда фаолиятини тугатиш арафасида турибди. Марказий ҳимоячи ҳам худди Роналду каби жаҳон чемпионатидаги сўнгги ўйинини ўтказди. Бир неча ойдан кейин у 40 ёшга тўлади. Пепе ЖЧ-2022да яхши иштирок этди: тўртта тўлиқ ўйин ўтказди, плей-оффда Швейцария дарвозасини ишғол қилди.
Эквадор: Эннер Валенция
Гуруҳ босқичидаги Эквадор қаҳрамони ҳам кейинги жаҳон чемпионатида ўйнаши даргумон. Терма жамоа сардори 33 ёшга тўлган. Лекин, унинг жанговар хислатлари ва ажойиб голлари барчанинг ёдида қолади. Валенция Қатарга қарши кечган ўйинда дубл қайд этиб, Голландия билан баҳсда эквадорликларни мағлубиятдан қутқариб қолди.
Англия: Кайл Уокер, Киран Триппиер, Жордан Хендерсон
Англия терма жамоаси 2022 йилги жаҳон чемпионатида ғалаба қозониш учун ҳақиқий даъвогарлардан бири эди. Жамоанинг мундиални тарк этиши учта футболчи учун аламли бўлган бўлиши аниқ. Уокер, Триппиер ва Хендерсон тўрт йилдан кейин 36 ёшга тўлади. “Tоттенҳем” ҳимоячиси ва “Ливерпул” ярим ҳимоячиси чиндан ҳам плей-оффда ажойиб ўйин намойиш этишди. Уокер Килиан Мбаппени тўхтатиб қолган бўлса, Хендерсон Сенегал дарвозасига гол урди.
Уэлс: Уэйн Хеннесси, Гарет Бейл
Уэлслик футбол юлдузи Гарет Бейл учун бу унинг фаолиятидаги биринчи ва охирги жаҳон чемпионати эди. Бейл америкаликлар дарвозасига пенальтидан гол уриб, бор кучини сарфлади. Лекин, ҳар бир ўйинда Гаретдан мўъжиза кутиб бўлмайди. Бейл билан биргаликда Уэлс терма жамоасининг асосий дарвозабони 35 ёшли Хеннесси жаҳон чемпионатлари билан хайрлашиши аниқ.
Мексика: Гилермо Очоа
Мексикалик дарвозабоннинг сўнгги жаҳон чемпионатларида кўрсатган мўъжизаларига ўрганиб қолганмиз. 2026 йилнинг ёзида Гилермо 41 ёшга тўлади. Албатта, дарвозабонлар, қоида тариқасида бошқа футболчилардан устун туради. Сабаби, улар бу ёшда ҳам бемалол футбол ўйнаши мумкин.
Полша: Комил Глик, Роберт Левандовски
Левандовскининг ўзи ҳам жаҳон чемпионатлари билан хайрлашди шекилли. Тўрт йилдан сўнг полшалик тўпурар деярли 38 ёшга тўлади. Бу ёшда Робертга жисмоний шаклини ушлаб туришдаги ажойиб қобилияти ҳам ёрдам бермаса керак. У ЖЧ-2022да иккита гол урди. 34 ёшли ҳимоя етакчиси Глик ҳам жаҳон чемпионатларида бошқа ўйнамаслиги мумкин.
Дания: Каспер Шмейхел, Симон Кер
Дания терма жамоаси Қатарда бўлиб ўтган жаҳон чемпионатининг энг омадсиз жамоаларидан бирига айланди. Терма жамоа билан биргаликдаги 36 ёшли Шмейхел ва 33 ёшли Кер ҳам муваффақиятсизликка учради. Тўрт йилдан сўнг уларнинг ўрнини Дания терма жамоаси сафида кейинги авлод футболчилари эгаллаши аниқ.
Франция: Уго Лорис, Оливе Жиру
Уго Лорис, Оливе Жиру Франция терма жамоасининг асосий дарвозабони ва тарихдаги энг яхши тўпурари. Улар Қатарда ўзларининг сўнгги жаҳон чемпионатларини ўтказишмоқда. Жиру аллақачон 36 ёшга тўлди, Ллорис эса 35 ёшда. Истеъдодларга бой Франция 2026 йилги жаҳон чемпионатида уларнинг хизматларига муҳтож бўлмайди, менимча.
Коста-Рика: Кейлор Навас
Коста-Рика терма жамоасининг афсонавий дарвозабони жаҳон чемпионатларида ажойиб ўйинлар кўрсатган. Албатта, Навас учун фаолиятидаги сўнгги жаҳон чемпионатида Испаниядан етти, Германиядан тўртта гол ўтказиб юбориш ёқимсиз бўлди. Аммо Япония устидан қозонилган ғалаба Навас учун ёқимли хотира бўлиб қолди.
Германия: Мануэл Нойер, Томас Мюллер
Нойер ва Мюллер бир бор жаҳон чемпионлигини қўлга киритишди. Охирги икки жаҳон чемпионати Германия учун омадсиз бўлди. Қатарда 36 ёшли Нойер ҳам, 33 ёшли Мюллер ҳам кутилган натижани бермади. 2026 йилгача форвард билан дарвозабон терма жамоа асосий таркибига кира олмайди.
Испания: Хорди Алба, Сезар Аспиликуэта, Серхио Бускетс
Бускетс 34 ёшида иккинчи марта жаҳон чемпионати олтин медалини қўлга киритиш имкониятини йўқ қилди. Аммо 33 ёшли Алба ва Аспиликуэта жаҳон чемпиони бўла олмаган. 2026 йилги жаҳон чемпионатида бу учликни кўрмаслигимиз мумкин. Сабаби, яқинда Бескетс терма жамоадаги фаолиятини тугатганини маълум қилди. Аспиликуэта Қатарда унчалик фойдали ўйин кўрсатмади. Алба эса Коста-Рика ва Германия дарвозасига гол урди.
Бельгия: Ян Вертонген, Тоби Алдервейрелд, Аксел Вицел, Эден Азар, Дрис Мертенс
Бельгияликлар 2026 йилги жаҳон чемпионатидаги ўйинини ҳисобга олган ҳолда таркибни ёшартиришлари керак. “Олтин” авлод футболчилари терма жамоа билан ҳеч нарса ютмасдан фаолиятларини якунлашмоқда. 35 ёшли Вертонген ва Мертенс ҳамда 33 ёшли Вицел ва Алдервейрелдлар учун бу турнир, эҳтимол, фаолиятидаги сўнгги жаҳон чемпионати бўлди. Азар 31 ёшда, агар хоҳласа, 2026 йилги жаҳон чемпионатида қатнашиши мумкин эди, аммо у термадаги фаолиятини тугатганини маълум қилди.
Хорватия: Деян Ловрен, Домагой Вида, Лука Модрич, Иван Перишич
Хорватлар икки марта жаҳон чемпионатида ғалаба қозонишга яқин келишди. Аммо энг иқтидорли авлодга ҳам омад кулиб боқмади. Навбатдаги жаҳон чемпионатида “шашкачилар” бу босқичга етиб келиши даргумон. Чунки, жамоа ажойиб дирижёр Модричсиз ўйнашга тўғри келади. Лука аллақачон 37 ёшга тўлди. Ловрен, Вида ва 33 ёшли Перишич ҳам тўрт йилдан кейин терма жамоага ёрдам беришмаса керак. Вида ҳаттоки ЖЧ-2022ни захира ўриндиғида ўтказди.
Бразилия: Дани Алвес, Тиаго Силва
Икки ажойиб бразилиялик ҳимоячи жаҳон чемпиони бўлмасдан фаолиятини якунламоқда. ЖЧ-2022 39 ёшли Дани Алвес ва 38 ёшли Тиаго Силва учун сўнгги имконият бўлди.
Камерун: Эрик Чоупо-Мотинг
Камерунлик ҳужумчи кузда “Бавария”нинг асосий ҳужумчиси ва тўпурарига айланди. Шундай қилиб, 2022 йилги жаҳон чемпионатига жамоанинг ҳақиқий юлдузи сифатида борди. Аммо Қатардаги турнирда у Камерун таркибида фақат битта самарали ҳаракатни амалга оширди. Яъни Сербия терма жамоаси дарвозасига гол урди. Унинг фаолиятида бошқа жаҳон чемпионатлари бўлмаса керак. Шупо-Мотинг 33 ёшда, У 2026 йилги жаҳон чемпионатига чиқиш қийин.
Сербия: Душан Тадич
Сербия терма жамоаси ҳам афсуски, ЖЧ-2022да муваффақиятсизликка учради. Бугунги жамоанинг кўпчилиги ЖЧ-2026да яна бир имкониятга эга бўлиши мумкин, бироқ сардор Тадич бундан мустасно. У аллақачон 34 ёшни тўлдирди. ЖЧ-2022да ярим ҳимоячи иккита голли узатмани амалга оширди.
Уругвай: Диего Годин, Мартин Касерес, Луис Суарес, Эдинсон Кавани
Уругвайлик афсонавий футболчилар 2022 йилги жаҳон чемпионатида жаҳонни забт этишга уриниб кўришди. Бироқ ўз жамоасининг гуруҳдан чиқишига ёрдам бера олишмади. 36 ёшли Годин, 35 ёшли Суарес, Кавани ва Касерес 4 йилдан кейин терма жамоада ўйнамаслиги мумкин.
