Путин генераллари билан йиғилиш ўтказди
Кремль РФ Президенти кеча махсус штабда Украинадаги ҳарбий ҳаракатлар юзасидан муҳокамалар ўтказилганини маълум қилган.
Владимир Путин “махсус ҳарбий амалиёт” доирасида ҳаракатланаётган қўшин турларининг бирлашган штабига ташриф буюрди. Бу ҳақда қатор Россия ахборот агентликлари хабар берди.
РФ Президентининг матбуот котиби Дмитрий Песковнинг сўзларига кўра, Путин кеча кун бўйи ушбу штабда йиғилиш ўтказган. Йиғилиш давомида “ҳарбий амалиёт” бўйича ҳисоботларни тинглаган ва қўмондонлар билан учрашган.
Россия телеканалларида намойиш этилган кадрларда Президентнинг ёнида мудофаа вазири Сергей Шойгу ва Бош штаб бошлиғи Валерий Герасимовларни кўриш мумкин. Кремль номи тилга олинган штаб қаерда жойлашганига аниқлик киритмаган.
Шу билан бирга Путин ҳарбий ҳаракатларнинг яқин ва ўрта истиқболлари бўйича таклифларни кўриб чиқишини айтган.
