Бир эртакнинг бахтли якуни
Ҳаммаси ўн олти йил илгари бошланганди.
Эртаклар бир бор экан бир йўқ экан деб бошланиб якунда барча қаҳрамонлар мурод-мақсадига етади. Яъни унда доим эзгулик ва ёвузликнинг бир-бирига қарши кураши тасвирланади ва охирида эзгулик ғалаба қозонади.
Бир ой давомида Қатар мезбонлик қилган футбол бўйича жаҳон чемпионатида мухлислар яна бир эртакнинг гўзал якунига гувоҳ бўлишди. Эртак давомида қаҳрамонлар қанчадан-қанча довонларни ошиб ўтишига, тоғу тошлар оралаб юришига тўғри келди. Охирида уларнинг барчаси ўз ниятларига эришишди. Воқеалар ривожи бир неча йил давомида мухлисларни ҳаяжонда ушлаб турди. Баъзи жойларда қаҳрамонлар бу курашда ожиздек кўринди. Бироқ, ҳар эртакнинг якуни эзгулик билан тугаши керак эди. Ва шундай ҳам бўлди.
2006 йил Аргентина сафида ўзининг биринчи жаҳон чемпионатида иштирок этган Лионел Месси атиги 19 ёшда эди. Бу мундиал ёш юлдуз учун тажриба майдончаси бўлиб хизмат қилди. Фаолиятида кескин ўсиш кузатилаётган ва яқинда жаҳон футболининг ёрқин юлдузи бўлиши кутилаётган футболчи Аргентина термасининг келажаги эди. 2008 йил Пекинда ўтган Олимпия ўйинларида терма жамоаси билан олтин медални қўлга киритади. Бироқ, миллий жамоадаги ўйинлар у учун омадсиз ўтади. Дастлабки йилларда терма жамоада унчалик ишлари юришмаган футболчи клублар миқёсидаги турнирларнинг энг ёрқин футболчисига айланади. 2009-2010 йилги мавсумда Европа чемпионлар лигаси ва Испания Суперкубогини қўлга киритади. Жамоасининг ғалабаларига муносиб ҳисса қўшган Месси 22 ёшида биринчи “Олтин тўп”ни қўлга киритади. Шундан сўнг эртакнинг асосий қаҳрамони саҳнага чиқиб келади. Мана шу йилдан кейин унинг фаолиятида катта ўзгаришлар содир бўла бошлайди. Клуб доирасида барча мукофотларга бирин-кетин эгалик қила бошлайди. Бироқ, аргентиналик мухлислар қаҳрамонидан бошқа нарса кутишарди. У ҳам бўлса, жаҳон чемпионати кубоги эди. Сабаби, 1986 йил афсонавий Марадона тортиқ этган ғалабадан сўнг терма жамоа мундиалларда муваффақиятсиз иштирок этиб келарди.
2010 йили Жанубий Африкада бўлиб ўтган жаҳон биринчилиги ҳам жанубий америкаликлар учун омадсиз якунланади. Термадаги жамоавийлик ва футболчиларнинг бир-бирини унчалик тушунмай ҳаракат қилиши панд беради. Мессининг якка ўзи жамоани ғалаба сари етаклай олмайди. Якунда плей-оффда Германияга 4:0 ҳисобида мағлуб бўлган Аргентина учун турнир аламли тарзда якунланади. Мухлисларнинг эса қаҳрамонга бўлган ишончи пасаяди. Бироқ, бу қаҳрамон Европа майдонларида тобора порлайверади. Миллардлаб мухлисларга эга бўлади. Гвардиола бошчилигидаги “Барселона”нинг энг ёрқин юлдузига айланади. Ана ўша йиллари Испанияда “Манчестер Юнайтед”дан “Реал Мадрид”га кўчиб ўтган Криштиану Роналду билан асосий рақобатда киришади. “Барселона” сафида 2010-2011 йилги мавсумда ҳам Европада тенгсиз деб топилади. Шунингдек, ўша йили «Олтин тўп» соҳибига айланади, бундан ташқари 2011-2012 йиллар ҳам ушбу мукофотга эга чиқади. Футболчи йигирма беш ёшгача тўрт бор дунёнинг энг яхши футболчиси унвонини қўлга киритади. Бу вақтга келиб бир қанча рекордларни қайд этган ҳужумчи клублар доирасидаги барча совринларни қўлга киритади. 2010 йилги мундиалдаги омадсиз иштирокдан сўнг, Мессининг асосий мақсади 2014 йили Бразилияда ўтадиган жаҳон чемпионатида чемпион бўлиш эди. Ўша даврда Аргентина терма жамоасида етишиб чиққан бир қанча иқтидорли футболчилар сабаб жамоа мусобақанинг асосий фаворитларидан бири деб эътироф этилади. Мессининг энг ёрқин даврига тўғри келган мусобақа, ҳужумчи учун яхши имконият эди. Мусобақа гуруҳ босқичининг барча ўйинларида ғалаба қозонган Аргентина чиндан ҳам турнир ғолиблиги учун асосий давогар эканлигини исботлайди. Нимчорак ва чорак финалда Швейцария ва “Олтин” авлоди бор Бельгияни мағлуб этган жунубий америкаликларга ярим финалда Нидерландия рақиблик қилади. Тўқнашувда Месси бошчилигидаги жамоа европаликларни пенальтилар cериясида мағлуб этишди. Шу тариқа мухлислар кутган финал босқичига йўлланма қўлга киритилди. Жамоанинг ўша вақтдаги ютуқларида Мессининг жуда катта ўрни бор эди. Бироқ, финалда ҳар томонлама жамоавий футбол намойиш этган Германия ғалабани ўзиники қилади. Шундан сўнг аргентиналик мухлисларнинг Леога муносабати яна кескинлашади. Футболчи кучли танқидлар остида қолади. Бу биз ҳикоя қилаётган эртак қаҳрамонининг навбатдаги мағлубияти эди. Мана шу муваффақиятсизликдан сўнг терма жамоа учун кетма-кет омадсиз мусобақалар бошланади. Қаҳрамонимиз энди мухлислардан битта чемпионлик қарз эканини ҳис этади. Аммо, барча ҳаракатлар самарасиз якунланади. 2015-2016 йиллари ўтказилган Америка кубогининг финал баҳсларида омад ундан чиндан юз угиради. Ҳар иккила финалда ҳам Аргентина рақибига аламли тарзда мағлуб бўлади. 2016 йилги финалда Чилига учралган мағлубиятдан сўнг Месси терма жамоадаги фаолиятини якунлашга қарор қилганди. Сабаби, у финалда пенальтилар церийасида муҳим голни ура олмайди. Футболчи ўшанда шундай деганди: “Қарор қабул қилинди. Мен терма жамоа билан соврин ютиш учун жуда қаттиқ ҳаракат қилдим. Бу сафар ҳам омадимиз келмаганидан жуда қайғудаман. Мен жуда муҳим пенальтини амалга ошира олмадим. Терма жамоа билан 4 марта финалда ютқаздим. Жамоа бугун ғалаба қозониш учун жуда ҳаракат қилди. Мен ҳам… Лекин бўладиган иш бўлди. Аргентина билан чемпион бўлишни жуда ҳам истагандим, аммо бунга эриша олмадим”, – деган Месси. Бироқ, ўшанда ҳужумчининг бу қароридан қайтаришга кўплаб инсонлар ҳаракат қилишди. Улар орасида Лионел Скалони ҳам бор эди. Аргентинага янги бош мураббий этиб тайинланган Скалони ўшанда Мессини кўп нарсага ишонтиради. Бугунги кунга келиб мураббий ўз вадасининг устидан чиқди. Олти йил ўтгач, 44 ёшли мутахассис Аргентина терма жамоаси устози сифатида Мессига учта халқаро совринни қўлга киритишга ёрдам берди. Улар Копа Америка-2021, Финалиссима-2022, ЖЧ-2022. Бир неча бор қоқилиб яна қайта турган Лионел Мессини қўллаб-қувватлайдиганлар кўпайди. Шуларнинг кўмакида эртак яхшилик билан якунланди.
Қатардаги мундиални мағлубият билан бошлаган Аргентина натижада жаҳон чемпионига айланди. Ўйиндан-ўйинга кучая борган жамоа ғолиблик учун муносиб ҳаракат қилди. Бундан ташқари финал баҳсида Франциядан кўра ғалабага кўпроқ лойиқ эди. Турнир давомида еттита гол урган Месси бир қатор рекордларни янгилаб ташлади. Хусусан, жаҳон чемпионатларида энг кўп ўйин ўтказган футболчилардан бирига айланди, бундан ташқари Аргентина терма жамоаси таркибида жаҳон чемпионатларида энг кўп гол урган ҳужумчига айланди.
Бир вақтлар афсонавий Марадона Аргентинага жаҳон чемпионлигини тақдим этганди. Энди эса бу ишни Лионел Месси деган неча йиллардан бери терма миқёсида танқидларга учраб келган янги бир қирол бажариб берди. Дунё футбол оламида у бутун футбол тарихида Пеле, Мароданалардан ҳам кучлироқ экани ҳақида гапиришмоқда. Чиндан ҳам шундай. Месси бир футболчи қўлга киритиши мумкин бўлган барча совринларга эга бўлди. Клубдаги ғалабалар билан бошланган қаҳрамонимиз иштирокидаги эртак терма жамоадаги бетакрор ўйинлар ва муҳим ғалаба билан якунланди. Аслида ҳам шундай бўлиши керак эди. Месси жамоада бир неча йил чемпион сифатида тўп суришини маълум қилди. Унга энди ҳамма нарса ярашаверади. Муҳими мухлислар қалбини забт этган эртак қаҳрамони уларнинг бутун бир ишончини ҳам қозонишга муваффақ бўлди. Футболчига ўзи мана шу керак эди. Энди Мессини Роналду билан таққослашлар ҳам тугаса ажаб эмас. Сабаби фақат унинг эртаги чиройли чемпионлик билан тугалланмоқда.
