Европада кутилаётган қишки трансферлар
ЖЧ-2022 қаҳрамонлари қаерга бориши мумкин?
Тез орада Европанинг етакчи лигаларида трансфер ойнаси очилади. Қоидага кўра, қишда ёзга қараганда анча кам битимлар амалга оширилади. Аммо ноодатий вақтда бўлиб ўтган жаҳон чемпионати муҳим трансферлар сонини кўпайтирмоқда. Мундиалдан сўнг футболчиларнинг қайси бири яқин келажакда клубини ўзгартириши мумкин? Қуйида шу ҳақда тўлиқ маълумотга эга бўлишингиз мумкин.
Криштиану Роналду: эркин агент → “Ал-Наср”
Португалиялик футболчи Қатарда бўлиб ўтган жаҳон чемпионати вақтида клубсиз қолди. Кутилганидек, шов-шувли интервью “МЮ” бошлиқларини ғазаблантирди. Ҳамда улар футболчи билан келишувни тугатишди. Роналдунинг қайси жамоага ўтиши айни вақтда мухлисларнинг диққат марказида бўлиб турибди. “АS” нашрининг хабарига кўра, ҳозирча Криштиану фақат битта расмий таклиф олган. Саудиянинг “Ал-Наср” клуби футболчини ўз сафига қўшиб олмоқчи. Бунинг учун клуб ҳужумчига мавсумига тахминан 200 миллион евро тўлашга тайёр. Аммо Роналду ҳали якуний қарорга келгани йўқ.
Саудияликларнинг ҳам ўзига яраша манфаати бор. Улар бундай шов-шувли трансфер 2030 йилги жаҳон чемпионатига мезбонлик қилиш ҳуқуқини қўлга киритишга ёрдам беришига ишонмоқда. “Ал-Наср” Роналду йил охиригача таклифни қабул қилади деган умидда. Роналду кейинги жаҳон чемпионатида ҳам ўйнашни хоҳламоқда. Ҳозирча биз ҳаммасини кузатишда давом этамиз.
Коди Гакпо: “ПСВ” → “Манчестер Юнайтед”
Жаҳон чемпионати олдидан Гакпо “ПСВ”да ўзининг ёрқин ўйинлари билан мухлисларнинг олқишига сазовор бўлганди. 23 ёшли футболчи мавсумнинг биринчи қисмида жуда муносиб статистикага эришди. У 24 та учрашувда 13 гол урди ва 17 та голли узатмани амалга оширди. Қатарда эса иқтидорли голландиялик футболчи гуруҳ босқичидаги ҳар бир ўйинда гол урган бўлсада, плей-оффда бироз омади юришмади. “Манчестер Юнайтед” Гакпога ЖЧ-2022 олдидан ҳам қизиқиш билдирганди. Энди эса клуб курашга янаям жиддий киришди.
Голландия клуби бош мураббийи Руд ван Нистелрой Коди қишки трансфер ойнасидаёқ бошқа жамоага ўтишини истисно қилмади.
Алексис Мак Аллистер: “Брайтон” → “Арсенал”, “Тоттенҳем”, “Манчестер Юнайтед”, “Атлетико Мадрид”
Жаҳон чемпионати олдидан фақат Премьер-лигани яқиндан кузатиб борадиганларгина Мак Аллистер ҳақида билишарди. Аргентиналик футболчи Қатардаги турнирни заҳирадан бошлади. Лионел Скалони турнир давомида футболчига кучли ишонч билдирди ҳамда натижада у ишончни оқлай олди. Мусобақа охирида эса Аргентина термаси билан жаҳон чемпионлигини қўлга киритди. Ҳозирда “Арсенал”, “Тоттенҳем”, “Манчестер Юнайтед” ва “Атлетико” клублари футболчи учун кураш олиб бормоқда. АПЛ етакчиси бош мураббийи Микел Артетанинг фикрича, Алексис жамоанинг ўйин тизимига жуда мос тушади. “Брайтон” эса футболчи билан шартномани узайтириш бўйича музокаралар олиб бормоқда. Мак Аллистер жорий мавсумда Премьер-лигада 14 та ўйинда майдонга тушиб 5 та гол урган.
Эмилиано Мартинес: “Астон Вилла” → “Бавария”
Мартинеснинг фаолиятида кескин ўсиш кузатилмоқда. Дарвозабоннинг агенти футболчи Чемпионлар лигаси клубида ўйнашга тайёрлигини айтган. Ҳозирча биринчи вариант “Бавария” клуби бўлиб турибди. Немис гранди мавсум якунига қадар Нойер билан хайрлашади ва энди унинг ўрнига ўринбосар қидирмоқда. Тўғри, “Бавария”нинг қисқа рўйхатида яна бир нечта муносиб номзодлар бор. “ПСЖ” захира ўриндиғида қолиб кетаётган Кейлор Навас ёки ЖЧ-2022 кашфиётларидан бирига айланган Доминик Ливакович.
Мартинес 2010 йилдан бери Англияда ўйнаб келмоқда. У “Арсенал”да ҳам тўп сурган айни пайтда эса “Астон Вилла”да ўйнамоқда. Жаҳон чемпионатида Эмилиано Аргентина терма жамоасининг ғалабасига катта ҳисса қўшди. Бундан ташқари у бир нечта провокацион хатти-ҳаракатлари билан ҳам ажралиб турди.
Софиан Амрабат: “Фиорентина” → “Ливерпул”
Марокаш терма жамоаси 2022 йилги жаҳон чемпионатида муносиб қатнашди. Бу эса терма аъзоси Амрабатнинг нархини сезиларли даражада оширди. “Фиорентина” 26 ёшли футболчи билан хайрлашишга яқин. Мундиалдан аввал унинг трансфермарктдаги нархи ҳозиргига қараганда тўрт баравар паст бўлган. Инсайдер Жанлука Ди Марсио Амрабат кейинги фаолиятини “Ливерпул”да давом эттирмоқчи эканлиги ҳақида хабар бермоқда.
Марокаш терма жамоаси бош мураббийи Валид Реграги бир ой олдин Софян Европанинг етакчи клубларидан бирига ўтишини башорат қилганди. Футболчига яна бир давогар “Тоттенҳем” клуби бўлиб турибди. Жорий мавсумда Амрабат Италия чемпионатида бор-йўғи иккита ўйинни ўтказиб юборган.
Иско: эркин агент → Премьер-лига клуби
Испаниялик футболчи “Севиля” билан шу йилнинг август ойида шартнома имзолаганди. Бироқ, орадан уч ой ўтиб томонлар шартномани бекор қилишгани маълум бўлди. 30 ёшли футболчи барча мусобақаларда 19 та ўйинда майдонга тушиб, 1 та гол урган ва 3 та голли узатмани амалга оширган.
Кўринишидан, Иско фаолиятини АПЛда давом эттиради. Унинг хизматларига “Арсенал” ва “Тоттенҳем” клублари қизиқиш билдирмоқда.
Энсо Фернандес: “Бенфика” → “Ливерпул” ёки “Реал”
Футболчи эндигина 21 ёшга тўлди. Шунингдек, у аллақачон жаҳон чемпиони ва 2022 йилги Жаҳон чемпионатининг энг яхши ёш футболчиси номига сазовор бўлди. Ўтган ёзда “Бенфика” футболчини “Ривер Плейт”дан сотиб олганди. Футбол учун 12 миллион евро тўлаган. Энди жамоа янада кўпроқ пул ишлаши аниқ. “Реал Мадрид” ва “Ливерпул” иқтидорли футболчига даъвогарлик қилмоқда. Премьер-лига клуби шартномада кўрсатилган товон пулини тўлашга тайёр. “Бенфика” эса футболчиларини топ-клубларга сотишда тажрибали эканини инобатга олсак, улар имкон қадар футболчи учун кўпроқ пул ишлашга ҳаракат қилишади.
Энсо Қатарда бўлиб ўтган жаҳон чемпионатини захира ўйинчиси сифатида бошлади. Дастлабки икки ўйинда захирадан майдонга тушди. Шундан сўнг мураббийлар штаби футболчига асосий таркибда ўйнаш имкониятини берди. Ва ҳужумчи бу имкониятдан унумли фойдаланди.
Мемфис Депай: "Барселона" → "Нюкасл"
Голландиялик футболчининг испан жамоаси билан шартномаси 6 ойдан кейин тугайди. “Нюкасл” Мемфисни Премьер-лигага қайтармоқчи (у 2015 йилдан 2017 йилгача “Манчестер Юнайтед”да ўйнаган), аммо “Барса” футболчини товон пулисиз қўйиб юбормоқчи эмас. Ушбу мавсумнинг биринчи қисми Мемфис учун омадли ўтмади. Натижада, ЖЧ-2022 олдидан Депай Испания чемпионатида бор-йўғи учта ўйин ўтказиб, битта гол урди. Тез орада Мемфис “Барселона” бош мураббийи Хави билан учрашув ўтказиши кутилмоқда, шундан сўнг кўп нарса ойдинлашади.
