Амир Темур туғилган қишлоқда очиқ осмон остидаги музей ташкил қилинмоқда
Ҳозирда лойиҳанинг илк босқичи амалга оширилган.
Қашқадарё вилоятининг Яккабоғ туманидаги Амир Темур туғилган жойда очиқ осмон остидаги музей ташкил қилинмоқда. Бу ҳақда вилоят туризм ва маданий мерос бош бошқармаси хабар берди.
Қайд этилишича, Хўжа Илғор қишлоғида амалга оширилаётган ушбу лойиҳанинг дастлабки босқичида ўтов уйлари, манзилга йўналтирувчи белги ҳамда Темурийлар салтанатининг рамзлари ва урф-одатларини ифодаловчи буюмлар олиб келиниб, ҳудудга ўрнатилган.
Шунингдек, мазкур ҳудуд атрофида мевали ва манзарали дарахт кўчатлари экилиб, ободонлаштириш ишлари олиб борилган.
Ўтовнинг ички қисми ҳам тўлиқ жиҳозланиб, қадимий гилам, кашталар, мис кўза, лавҳ, бешик, кўрпачалар ҳомийлар томонидан тақдим этилган.
Лойиҳанинг навбатдаги босқичларида очиқ осмон остидаги музей ҳамда хизмат кўрсатиш объектлари яратилади.
