Бахмутнинг қанча қисми вайрон этилган?
Айни кунларда ушбу шаҳар Россия-Украина кучларининг Донбассдаги асосий тўқнашув нуқтаси бўлиб турибди.
Айни кунларда Россия ва Украина кучларининг асосий тўқнашув нуқтаси бўлиб турган Бахмутнинг 60 фоизи вайрон қилинган. Бу ҳақда Донецк вилояти администрацияси раҳбари Павел Кириленко маълум қилди.
“Душман қанча ҳаракат қилмасин, у олдинга силжимаяпти. Улар қанчалик муваффақиятга эришган бўлмасин, яна шаҳар ташқарисига улоқтириб ташланди. Амалда улар ҳозир текисликда турибди, бу шахсий таркиб ўртасида катта йўқотишларга сабаб бўлмоқда”, – деган Кириленко.
Бахмут учун жанг 6 ойдан ортиқ давом этмоқда. Владимир Зеленский 4 январь кунги видеомурожаатида шаҳарда ҳаракатланаётган барча украин ҳарбийларига миннатдорчилик билдирди.
Украина президентининг сўзларига кўра, Россия олти ойдан буён бутун Донбассни ишғол этишга ҳаракат қилмоқда. У ушбу ҳудудда россияликлар кучларини доимий равишда ошириб бораётганини айтган.
