У тиллардан-тилларга достон бўлишда давом этмоқда
Мессини яна энг зўр футболчи деб топишди.
Халқаро футбол тарихи ва статистикаси федерацияси “IFFHS” “ПСЖ” ва Аргентина терма жамоаси ҳужумчиси Лионел Мессини 2022 йилда дунёнинг энг яхши футболчиси деб топди.
Аргентиналик футболчи овоз беришда 275 очко тўплади ва 35 очко жамғарган “ПСЖ” ва Франция терма жамоаси ҳужумчиси Килиан Мбаппени анча ортда қолдирди. Дунёнинг энг яхши футболчилари учлигини “Реал” ва Франция терма жамоаси ҳужумчиси Карим Бензема (30 очко) якунлади. Кучли бешликка “Реал” ярим ҳимоячиси Лука Модрич (15) ва “Манчестер Сити” ҳужумчиси Эрлинг Ҳоланд (5) кирди.
Эслатиб ўтамиз, Қатарда ўтган сўнгги жаҳон чемпионатида Аргентина терма жамоаси таркибида Лионел Месси турнир ғолибига айланганди. Ҳужумчи жаҳон чемпионатининг энг яхши футболчиси деб топилди. Турнир давомида у еттита гол урди ва учта голли узатмани амалга оширди.
