Марокашдаги стадионга Ҳакимининг номи берилди
Футболчининг ўзи бу ҳақда маълумот берди.
Марокашнинг Эл-Қаср ал-Кабир шаҳридаги стадионга миллий терма жамоа ва “ПСЖ” ҳимоячиси Ашраф Ҳакимий номи берилди. Бу ҳақда футболчининг ўзи маълум қилди.
24 ёшли футболчи шаҳар ҳокимияти томонидан унинг шарафига ташкил этилган очилиш маросимида шахсан иштирок этган. Эл-Қаср ал-Кабир - Ҳакимийнинг онасининг она шаҳри.
“Менинг номим билан аталган футбол стадионини очиш мен учун шарафдир. Мени қўллаб-қувватлаганликлари ва меҳр-муҳаббатлари учун ҳокимият ва шаҳар аҳолисига миннатдорчилик билдираман”, — деди Ҳакими.
Эслатиб ўтамиз, Қатарда бўлиб ўтган 2022 йилги жаҳон чемпионатида Марокаш терма жамоаси ярим финалга қадар этиб борган ва бу Африка терма жамоалари учун турнирлар тарихидаги энг яхши натижа бўлганди.
