“Ювентус” суд қароридан кейин расмий баёнот берди
Клуб санкцияларга қаршилик билдирмоқда.
“Ювентус” расмий веб-сайтида баёнот эълон қилинди. Унда улар клубга нисбатан қўлланилган санкциялар устидан апелляция бериш ниятида эканликларини билдирган.
“Клуб санкцияларнинг сабаблари эълон қилинишини кутмоқда. “Спорт адолати тўғрисида”ги кодекс доирасида бу кўриб чиқилиши керак”, — дейилади хабарда.
Аввалроқ, Федерал апелляция суди Италия футбол федерацияси прокурорининг клуб фаолиятидаги молиявий қоидабузарликлар учун “Ювентус”га қарши ишни қайта бошлаш ҳақидаги илтимосини қаноатлантирганди.
“Ювентус” жорий мавсум Италия чемпионатида 15 очкодан маҳрум бўлади. Шу тариқа, 22 очкога эга бўлган туринликлар А Cерия турнир жадвалида 10-ўринга тушиб кетади.
Турин клуби ноқонуний капитални қўлга киритганликда айбланмоқда: футболчиларнинг трансфер нархини ошириб юбориш, шунингдек, ходимларнинг нархини камайтириб кўрсатиш ва футболчилар маошининг ҳақиқий ҳажмини яшириш.
Бунгача “Ювентус” 37 очко билан турнир жадвалида учинчи ўринда эди.
