Қийинчиликда ўтган болалик, дастлабки бизнес ва 10 миллион евролик вилла
Новак Жокович қандай қилиб дунёнинг энг бой теннисчига айланди?
4 ёшда бошланган машғулот
Новак Жокович 1987 йил 22 майда Сербиянинг Белград шаҳрида туғилган. Новак теннис билан 4 ёшида шуғуллана бошлаган. Желена Генчич Жоковичнинг иқтидорини тан олади ва унга 6 йилдан ортиқ мураббийлик қилади. 11 ёшида Желене бўлажак теннисчини Германияга Никола Пилич билан машқ қилиш учун юборади. 2003 йилда Жокович профессионал спортчига айланади.
Карьера ва ютуқлар
Теннисчига “Grand Slam” турнирида дебют қилиш учун икки йил керак бўлди. 2005 йилда у “Australian Open” турнирига йўлланма олади ва 2006 йилда у ўзининг биринчи АТП чемпионлигини қўлга киритади. Ўшанда Новак “Dutch Open” чемпионига айланади. У “Катта дубулға” турнирларида биринчи бор 2008 йилда Австралия Очиқ чемпионати чемпиони бўлади. “Australian Open” унинг энг севимли “Катта дубулғa” турнири ҳисобланади. 2015 йил Новак Жокович фаолиятидаги энг яхши йил саналади. Ўша йилда у учта “Катта дубулға”, “ATP World Tour” финали ва бошқа кўплаб АТП турнирларида ғолиб чиқади. Теннисчи 2016 йилга келиб барча 4 та “Катта дубулға” турнирларида ғалаба қозонишга муваффақ бўлди. 2016 йилги Франция Очиқ чемпионати финали йўлида у испаниялик Рафел Надални мағлуб этди. Финалда эса Энди Маррейдан устун келди.
Новак Жокович кўп йилллардан бери дунё теннисида биринчиликни ҳеч кимга бермай келмоқда. Бугунга келиб “Катта дубулға” турнирларининг 20 карра ғолибига айланган спортчи, АТП рейтингида энг кўп пешқадамлик қилиш бўйича рекорд ўрнатган. Бироқ, унинг болалиги бахтли ўтган дейиш қийин.
“Нонга ҳам пул етмаган”
Жокович Сербия пойтахтида туғилган. Унинг болалик қийин кечади. Бўлажак теннисчининг оиласи жуда камбағал яшаган.
“Оиламиз учун ҳаёт нақадар оғир кечганини одамлар билади. Ўшанда Новакнинг харажатлари молиявий имкониятларимизга жавоб бермасди. Лекин, биз бошқалардан қарз олиш эвазига буни имконини қилардик. Ҳатто бир хил вақтларда нон сотиб олишга ҳам пулимиз бўлмасди. Кейин аёлим заргарлик буюмларини гаровга қўйди. Биз ўн йил давомида ижарага олинган квартирамизда қийинчиликда яшаганмиз”, — деб эслайди Жоковичнинг отаси ўзининг интервьюларидан бирида.
Новакдан ташқари, оилада Жорж ва Марко исмли яна иккита ўғил бор, улар ҳам ҳозирда спорт соҳасида ишлайди.
“Новак мени илҳомлантиради. У теннисда жуда кўп ютуқларга эришди ва ҳали ҳам олдинга қадам босишда давом этмоқда. Ва шунга қарамай, биз бошқа ака-ука ва опа-сингиллар каби муносабатларимизни ижобий сақлаб қоламиз”, — деди Новакнинг катта акаси Жорж.
Дастлабки бизнеслар
Қашшоқликдан ва Югославия қулашидан омон қолган оила қийинчиликлар билан ривожлана бошлади. 2009 йилдан 2013 йилгача унинг укаси Жорж Белграддаги теннис турнирининг молиявий директори бўлган. Жоковичлар оиласи спорт тадбирлари ва овқатланишга ихтисослашган ўзининг “Family Sport” компаниясига асос солади ва ушбу турнирни ўтказиш ҳуқуқини қўлга киритaди. Шунингдек, Новак “Cafe” деб номланувчи кафелар тармоғини очди.
10 миллион евролик вилла
Новакнинг укаси Сербияда теннис ва бизнесни ривожлантиради, Новак эса Монакода яшашни афзал кўради. У ерда у ҳашаматли виллада рафиқаси Элена ва икки фарзанди - Стефан ва Тара билан бирга яшайди.
2020 йилда бутун дунёга коронавирус тарқалгани сабабли Жоковичлар оиласи Испанияга кўчиб ўтишга мажбур бўлди. У ерда уларнинг кино, ўйин, тўққизта ётоқхонаси, саккизта ҳаммом ва теннис корти бўлган 10 миллион евролик ҳашаматли виллага кўчишади. Ҳамма сербиялик спортчининг Марбелага доимий яшаш учун келгани ҳақида гапиришди, аммо бу унинг оиласи учун баҳор-ёз карантин давридаги вақтинчалик яшаш жойи эканлиги маълум бўлди.
Дунёнинг энг бой теннисчиси
Дунёнинг энг машҳур ва энг кўп маош олувчи уч теннисчисидан бири бўлган Жокович учун бундай харидлар катта муаммо эмас. У “Forbes” рейтингида доимий равишда иштирок этади. Масалан, 2021 йилда у 38 миллион даромад билан дунёнинг энг кўп маош олувчи теннисчилари рўйхатида тўртинчи ўринни эгаллади. Фақатгина Рожер Федерер (90,6 миллион), Наоми Осака (60,1 миллион) ва Серена Уилямс (41,8 миллион) ундан юқори ўринларни эгаллаган. Икки йил олдин эса у худди шу рейтингда иккинчи бўлганди. Фақат Рожердан кейинги ўриндан жой олган. Бироқ, 2019-2020 йил якунларига кўра, АТПда энг кўп мукофот пулига эга бўлган теннисчига айланганди.
Жоковичнинг умумий бойлиги қанча?
Новак тўхташни хоҳламяпти. У 34 ёшида ҳам рақибларидан устун келишда давом этмоқда. 2022 йил буюк сербиялик спортчи учун тарихий йил бўлди. У теннис тарихида қўлга киритган мукофот пуллари ҳисоби бўйича мутлақ биринчи ўринни эгаллади. Бу миқдор 154 миллион долларни ташкил этди. Шу орқали Жокович мукофот пули сифатида 100 миллион доллар ишлаб топган дунёдаги биринчи теннисчига айланди. Унинг энг яқин таъқибчиси швейцариялик Рожер Федерер бўлиб, у 98 миллион доллар олган.
“Forbes” нашрининг 2015 йилдаги энг кўп маош олувчи спортчилар рўйхатида Жокович 13-ўринни эгаллади. Унинг йиллик даромади 48 миллион долларга баҳоланган, шундан 17,2 миллион доллари мукофот пули ва 31 миллион доллари реклама шартномаларидан иборат.
“Celebrity Net Worth” нашрининг маълумотларига кўра, Новак Жоковичнинг бойлиги 220 миллион долларни ташкил қилади. У теннис спортида мукофот пуллари бўйича барча даврларнинг етакчиси ҳисобланади. Жокович 2017 йилда 145 миллион доллар мукофот олган. Бундан ташқари “XNUMX” ва “Lacoste” компаниялари билан шартнома имзолаган. “ASICS” бренди ҳам Новакга ҳомийлик қилади.
Теннисчига ҳомийлик қилувчи бошқа кўплаб брендлар қаторига “Head”, “NetJets”, “Seiko Watch Corporation” ва Peugeot” киради. Уни Сербия телекоммуникация компанияси “Telekom Srbija” ва немис озиқ-овқат қўшимчалари “FitLine” бренди ҳам қўллаб-қувватлайди. Бундан ташқари, Новак “Ultimate Software” компаниясининг элчиси ҳисобланади.
