Трансфер нархи кескин пасайган футболчилар

 

Сўнгги уч йил ичида дунёнинг энг қиммат 10 нафар футболчиси рейтинги тез-тез ўзгариб турди. Унда ёш юлдузлар тажрибали етакчиларни ортда қолдиришди. Мазкур футболчилар орасида эса нархи кескин тушиб кетган бир нечта ўйинчилар бор. Биз юлдузлар нархининг пасайишини кўриб чиқишга қарор қилдик. Қуйида сўнгги уч йил ичида ўйинчиларнинг трансфер нархининг ўзгариши ҳақида сўз боради.

 

Кевин Де Брюйне, 31 ёш, ярим ҳимоячи, “Манчестер Сити”, 150 миллион евро → 80 миллион евро

 

Бельгиялик футболчи ёзда 32 ёшга тўлади. Унинг карераси якунига етиб бормоқда. Кевин Бельгия терма жамоаси билан ҳеч қандай совринни қўлга кирита олмади. “Манчестер Сити” билан ҳам Чемпионлар лигасидаги ғалаба қозона олмади.  Бироқ, унинг ўйини деярли ўзгаргани йўқ. Ярим ҳимоячи ҳам гол урмоқда ва голли узатмаларни амалга оширмоқда. Уч йил давомида Кевин Де Брюйне 136 учрашувда 41 та гол урди ва 59 та узатмани амалга оширди.

 

Муҳаммад Салoҳ, 30 ёш, ҳужумчи, “Ливерпул”, 150 миллион евро → 80 миллион евро

 

Охирги уч йил мисрлик футболчи учун жуда омадли келди. Муҳаммад Салоҳ Англия Премьер-лигасида бир мавсумда ўртача 20 та гол урди, ўтган мавсумда 14 та голли узатма билан шахсий рекордини ўрнатди. Бундан ташқари учта миллий соврин - Англия кубоги, Суперкубоги ва Лига кубогини қўлга киритди. Ёшининг улғайиши сабаб унинг трансфер қиймати ҳам пасайиб бормоқда. Муҳаммад Салоҳ аввалги даражасида ўйнай олмаяпти. У айни вақтда Премьер-лиганинг 19 ўйинида 7 та гол урган.

 

Саул Нигес, 28 ёш, ярим ҳимоячи, “Атлетико”, 90 миллион евро → 15 миллион евро

 

Афтидан, испаниялик футболчи фаолиятининг чўққиси ниҳоясига етди. 2021 йилнинг ёзида “Атлетико” уни “Челси”га 5 миллион евро эвазига ижарага берди. У ерда Саул Нигес захира ўйинчисига айланди. Мадридга қайтганидан сўнг бир қанча ўйинларда майдонга тушди. 2019 йилнинг ноябрь ойидан бери 28 ёшли ярим ҳимоячи Испания терма жамоасига чақирилмади. Бироқ 2020/2021 йилги мавсумда Саул Испания чемпионига айланди. Шу тариқа у матрасчилар билан Чемпионлар лигаси ва клублар ўртасидаги жаҳон чемпионатидан ташқари барча совринларни қўлга киритди.

 

Деле Алли, 26 ёш, ярим ҳимоячи, “Бешиктош”, 90 миллион евро → 14 миллион евро

 

Англиялик футболчининг 2018/2019 йилги мавсумдаги фаолияти ажойиб ўтди. Бироқ, шундан сўнг Деле Аллининг ўйинида катта пасайиш кузатилди. У 26 ёшида Туркия чемпионатига йўл олди. 2018/2019 йилги мавсумда у олтита жароҳат олди, шундан сўнг у аввалги даражасига қайтмади. 2022 йилнинг биринчи ярмида “Эвертон”да ҳам фаолиятини қайта бошлай олмади. Жорий мавсумда у “Бешиктош”нинг 15 та ўйинидан 9 тасида майдонга тушди. Деле Алли уч ярим йилдан бери Англия терма жамоасига чақирилмайди.

 

Неймар, 30 ёш, ҳужумчи, “ПСЖ”, 160 миллион евро → 75 миллион евро

 

Неймар ҳам кексайиб бормоқда. У 5 февраль куни 31 ёшга тўлади. Ҳужумчи Бразилия терма жамоаси билан Америка кубоги ва жаҳон чемпионатида ғалаба қозона олмади. “ПСЖ” билан эса ҳалигача Чемпионлар лигасида чемпион бўлмаган. У 2020 йилнинг январидан бери 11 та жароҳати туфайли Париж клубининг 42 ўйинини ўтказиб юборган. Лига 1нинг ушбу мавсумида ҳужумчи аъло даражада ҳаракат қилмоқда.

 

Лионел Месси, 35 ёш, ҳужумчи, “ПСЖ”, 140 миллион евро → 50 миллион евро

 

Аргентиналик футболчи ёзда 36 ёшга тўлади. Трансфер қийматининг пасайиши ёш билан боғлиқлиги мантиқан тўғри. Месси “ПСЖ”да биринчи мавсумни унчалик яхши ўтказмади. Лекин иккинчи мавсумида у “Барселона”дагидек самарали ўйин кўрсатмоқда. Бундан ташқари жаҳон чемпионатига ажойиб формада келди. Ҳужумчи Аргентина билан мусобақада ғалаба қозониб, турнирнинг энг яхши ўйинчисига айланди. Жорий мавсумда Лео “ПСЖ” сафида барча турнирлар доирасида 23 ўйинда 14 та гол урди ва 14 та голли узатмага муаллифлик қилган. 2018 йилда ўзининг энг юқори чўққисида ҳужумчи 180 миллион еврога баҳоланган. Таққослаш учун, 35 ёшида Криштиану Роналдунинг нархи 60 миллион евро эди.

 

Садио Мане, 30 ёш, ҳужумчи, “Бавария”, 150 миллион евро → 60 миллион евро

 

Сенегаллик футболчининг ҳам энг яхши йиллари ортда қолди. 2020 йилдан буён Садио Мане “Ливерпул” билан Англия кубоги, мамлакат кубоги ва лига кубогини қўлга киритди. “Бавария” билан Германия Суперкубоги соҳибига айланди. Бу вақт ичида форвард Премьер-лиганинг 86 та учрашувида 35 та гол урди ва 13 та голли узатмани амалга оширди. Мане “Ливерпул” билан шартномасини узайтиришни истамади, чунки у анчадан бери жамоани тарк этишни режалаштирган эди. 2022 йилнинг ёзида немис клуби унинг учун 32 миллион евро тўлади, футболчининг ўзи эса 3 йиллик шартнома имзолади. “Бавария”да ҳужумчи 23 та ўйин ўтказиб, 11 та гол урди ва тўртта голли узатмани амалга оширди.

 

Раҳим Стерлинг, 28 ёш, ҳужумчи, “Челси”, 160 миллион евро → 70 миллион евро

 

Сўнгги мавсумларда англиялик футболчининг ҳам Премьер-лигадаги ўйини пасайиб бормоқда. Ёзда “Манчестер Сити” Раҳим Стерлингни 56,2 миллион еврога “Челси”га сотди ва футболчи янги клуби билан 5 йиллик шартнома имзолади. 28 ёшли ҳужумчи “кўклар” сафида шу вақтга қадар 22 та ўйинда майдонга тушди. 5 январь куни Англиянинг тўрт карра чемпиони жароҳатидан фориғ бўлди.

 

Антуан Гризманн, 31 ёш, ҳужумчи, “Атлетико”, 120 миллион евро → 25 миллион евро

 

Уч йил ичида француз футболчиси “Барселона”га ўтиб, яна “Атлетико”га қайтишга муваффақ бўлди. Антуан Каталония клубида Мадриддагидан кўра ёмонроқ ўйнади ва фақат “Барса” билан Испания кубогини қўлга киритди.

 

Эден Азар, 32 ёш, ҳужумчи, “Реал”, 120 миллион евро → 7,5 миллион евро

 

Бельгиялик футболчининг трансфер нархи уч йил ичида 93,8 фоизга арзонлашган. Бу мутлақ рекорддир. Уч ярим йил ичида у “Реал Мадрид” сафида 73 та ўйин ўтказиб, 7 та гол урган, терма жамоада эса 20 та ўйинда уч гол уришга муваффақ бўлди. Шу билан бирга, Эден Азар жароҳати сабаб 70 та ўйинни ўтказиб юборди. Бундай юқори жароҳатларга қарамай, ҳужумчи икки марта мамлакат чемпионлиги ва Испания Суперкубогини қўлга киритди. Шунингдек, Чемпионлар лигаси ва UEFА Суперкубоги ғолибига айланди.