Қатарлик инвесторлар яқин кунларда Манчестер клубини сотиб олиш таклифи билан чиқишади
Қатар амири ушбу жамоага мухлислик қилади.
Қатарлик инвесторлар яқин кунларда “Манчестер Юнайтед”ни сотиб олиш таклифи билан чиқишади. Бу ҳақда “Даилй Маил” нашри хабар берди. Улар акцияларнинг бир қисмини сотиб олишдан манфаатдор эмас. Инвесторлар клубни тўлиқ сотиб олишни ўйламоқда.
Хабар қилинишича, потенциал харидорлар Эрик тен Хагга клубни Англия футболи чўққисига қайтариш учун катта трансфер буджетини беришга тайёр бўлишади.
Шунингдек, сармоядорларнинг Олд Траффорд стадионини реконструкция қилиш ишларини олиб бориш истаги борлиги қайд этилган. Улар клубни сотиб олиш, стадионни таъмирлаш ва жиҳозларни янгилаш учун тахминан 8 миллиард фунт сарфлашлари кутилмоқда.
Қатар амири Тамим бин Ҳамад Ол Тани Манчестер “Юнайтед”га мухлислик қилади. У клуб тарихини жуда яхши билади. 2011 йилда Ал Тани аллақачон “Глейзерс”га 1 миллиард фунт стерлингдан кўпроқ пул таклиф қилиб, “Юнайтед”нинг активларини сотиб олишга уриниб кўрган эди, аммо рад жавобини олган. Ўша йили қатарликлар “ПСЖ”нинг 70% улушини сотиб олишган.
“Манчестер Юнайтед”ни сотиб олишда қатарликларнинг асосий рақобатчиси сифатида Буюк Британиянинг энг бой одами ва клубнинг узоқ йиллик мухлиси Жим Ратклифф кўрсатилган.
