ПФЛ бир йиллик молиявий ҳисоботларни очиқлади
Бугун ОАВ ходимлари иштирокида йиғилиш бўлиб ўтди.
Бугун Ўзбекистон Профессионал футбол лигаси “Бунёдкор” стадионининг анжуманлар залида 2022 йилда қилинган ишлар бўйича молиявий ҳисоботни тақдим этди.
Унда лига раҳбарияти 2022 йилда қатор йўналишларда қанча харажат қилингани ва ташкилотнинг йиллик даромадларини очиқлади.
Маълум бўлишича, 2022 йилда ташкилотга келиб тушган маблағ 18 712 135 600 сўмни ташкил қилган. Шундан 9 467 135 600 сўми ҳомийлар томонидан жалб қилинган маблағ ҳисобланади. Бадал пуллари 5 595 000 000, легионер футболчилар учун тўлов эса 3 030 000 000 сўмни ташкил қилган.
Йиғилган маблағларнинг 50,6 фоизи ПФЛнинг ўзи томонидан топилган пуллар, 49,4 фоизи эса бадал пуллари эвазига тўпланган.
Бундан ташқари ПФЛ ўз тасарруфидаги турли мусобақаларни "Элевен Спортс" портали орқали трансляция қилишдан ҳам 33 350 евро ишлаб топган. Бу ярим йиллик даромад ҳисобланади.
ПФЛ бош директори Диёр Имомхўжаевнинг сўзларига кўра, ташкилот ҳали бадал пуллари, ҳомийлар ва легионерлар учун тўловдан умумий ҳисобда 1 065 000 000 сўм олмаган.
