БМТ: 21 миллиондан ортиқ яманликлар ёрдамга муҳтож
АҚШ Яманга 444 миллион доллардан ортиқ қўшимча гуманитар ёрдам ажратди.
Бирлашган Миллатлар Ташкилоти маълумотларига кўра, Ямандаги гуманитар эҳтиёжлар ортиб бормоқда. Хусусан, мамлакат аҳолисининг учдан икки қисми бўлган 21 миллиондан ортиқ яманликлар ёрдам ва ҳимояга муҳтож.
Женевада Яманни қўллаб-қувватлаш учун маблағ йиғиш мақсадида халқаро донорлар конференцияси бўлиб ўтди. Урушдан вайронага айланган мамлакатдаги 17,3 миллион кишини ҳимоя қилиш учун инсонпарварлик сўрови 4,3 миллиард долларни ташкил этади. Бугунги кунга келиб, мамлакатдаги гуманитар вазият дунёдаги энг оғир инқирозлардан бири бўлиб қолмоқда.
Бундан ташқари, Яман уруш давом этаётган бошқа мамлакатлардан, асосан Сомали ва Эфиопиядан 100 мингга яқин қочқин ва бошпана изловчиларни қабул қилган.
АҚШ Давлат котиби Энтони Блинкен Яманга 444 миллион доллардан ортиқ қўшимча гуманитар ёрдам кўрсатилишига ваъда берди.
"Қўшма Штатларнинг дунёдаги энг даҳшатли гуманитар инқироздан миллионлаб одамларнинг азоб-уқубатларини енгиллаштириш мажбурияти қатъийлигича қолмоқда", — деди Блинкен.
