Алаба “Реал”га ёрдам беролмайди
Жамоа 15 март куни “Ливерпул”га қарши баҳс олиб боради.
Мадриднинг “Реал” клуби марказий ҳимоячиси Давид Алаба 15 март куни “Ливерпул”га қарши Чемпионлар лигаси 1/8 финали жавоб ўйинини ўтказиб юборади. Чунки у жароҳатидан тикланишда давом этмоқда. Бу ҳақда “The Atletic” журналисти Марио Кортегана маълум қилди.
Алаба “мерсисайдликлар” билан “Энфилд” стадионида бўлиб ўтган ўйинда жароҳат олган эди. 19 март куни “қаймоқранглилар” “Барселона” билан баҳс олиб бориши керак. Бироқ Алаба “Эл-Классико”га қайтишга улгурадими ёки йўқми, номаълум.
Кортегана хабарига кўра, “Реал Мадрид”нинг бошқа етакчилари, ҳужумчи Карим Бензема ва қанот ҳимоячиси Ферланд Менди қайтишга яқин турибди. Франциялик футболчи “Эспанёл”га қарши 25-тур ўйинини ўтказиб юборганди. Менди эса Испания кубоги доирасида “Атлетико”га қарши ўйинда олган жароҳати туфайли январь ойидан бери майдонга тушмаяпти. Кеча иккала футболчи ҳам тўлиқ машғулотларда иштирок этди.
