Глобал иқтисодий ўсиш прогнозлари яхшиланди
Иқтисодий ҳамкорлик ва тараққиёт ташкилоти бу бўйича махсус ҳисобот эълон қилди.
Иқтисодий ҳамкорлик ва тараққиёт ташкилоти 2023 йилда дунё иқтисодиёти 2.6 фоизга ўсишини прогноз қилди. Бу 2022 йил нобяридаги тахминлардан юқори кўрсаткич ҳисобланади.
Ўтган йили охирида ташкилот глобал иқтисодиёт 2.2 фоизга ўсишини маълум қилганди. 2024 йилги кўрсаткичлар ҳам яхшиланган: ноябрда бу 2.7 фоиз деб кўрсатилган бўлса, эндиликда 2.9 фоизгача оширилди. Экспертларнинг фикрича, истеъмолчилар ва ишлаб чиқарувчиларнинг кайфияти аста-секин яхшиланиб бормоқда, инфляция босими камаймоқда.
Дунё иқтисодиёти ўсишига ижобий таъсир кўрсатадиган бошқа омил сифатида таҳлилчилар Хитой бозорининг очилиши ва хомашё товарларига нархларнинг пасайишини кўрсатишган.
Шу билан бирга глобал иқтисодий ўсишнинг 2023 ва 2024 йилги суръатлари узоқ истиқболдаги тренд даражасидан паст бўлади, бунда дунёнинг энг йирик банклари томонидан пул-кредит сиёсатининг қаттиқлашиши сабаб қилиб кўрсатилган. Украина урушининг номаълум якуни ҳам ўсишнинг секинлашишига олиб келади.
