Тошкентда бир соатлик электр узилиши иқтисодиётга 3,5 млн доллар зарар етказиши мумкин
Айрим омиллар сабаб реал зарар бироз камроқ бўлиши, иккиламчи оқибатлар ҳисобга олинганда эса йўқотишлар каррасига ортиши эҳтимоли бор.
Иқтисодчи Миркомил Холбоев Тошкентда кузатилган электр узилиши иқтисодиётга қанчага тушиши мумкинлиги ҳақида ёзди.
Маълум қилинишича, Тошкент шаҳрида бир соат давомида қарийб 42 миллиард сўмлик ялпи ички маҳсулот яратилади.
Иқтисодчининг таъкидлашича, агар пойтахтда бир соат электр таъминоти узилса, бу даврда 42 миллиард сўмлик иқтисодий қиймат яратилмай қолади. Лекин айрим тармоқларнинг электрга боғлиқ эмаслиги ва захира генераторлар мавжудлиги сабабли реал зарар бироз камроқ бўлиши мумкин.
Шу билан бирга, электр узилишининг иккиламчи оқибатлари ҳисобга олинса, иқтисодий йўқотишлар каррасига ортиши мумкинлиги ҳам қайд этилди.
Оддий ҳисоб-китобларга кўра, бир соатлик электр узилиши натижасида иқтисодиёт камида 3,5 миллион АҚШ доллари миқдорида йўқотишга учраши эҳтимоли бор.
Эслатиб ўтамиз, 2026 йил 4 июнь куни соат 12:41 да Тошкент иссиқлик электр станциясидаги трансформаторда носозлик юзага келди.
Ҳодиса оқибатида Миробод, Юнусобод, Мирзо Улуғбек, Шайхонтоҳур ва Олмазор туманларининг айрим ҳудудларида электр таъминотида вақтинчалик узилиш кузатилган.
Соат 13:22 ҳолатига кўра, барча истеъмолчиларнинг электр таъминоти тўлиқ қайта тикланди.
Бу ҳолат метрополитен фаолиятига ҳам таъсир кўрсатиб, айрим йўналишларда поездлар ҳаракати вақтинча тўхтатилди. Соат 14:16 да эса Тошкент метрополитенининг барча йўналишлари ва бекатларида электр таъминоти тўлиқ тикланди.
