Ўзбекистонда ташкилот ва муассасалар 178,1 трлн сўмлик солиқ ва божхона имтиёзларидан фойдаланди
143 205 та субъект солиқ имтиёзларидан, 15 346 та ташкилот божхона имтиёзларидан фойдаланган.
Коррупцияга қарши курашиш агентлиги томонидан Президент фармони асосида корхоналарнинг 2025 йил якуни бўйича солиқ ва божхона имтиёзларидан фойдаланиш ҳолатига оид маълумотларнинг очиқ эълон қилиниши таҳлил қилинди.
Маълумотларга кўра, ҳисобот даврида умумий қиймати 178,1 трлн сўмлик солиқ ва божхона имтиёзлари қўлланилган.
Хусусан, 143 205 та субъект солиқ имтиёзларидан фойдаланган бўлиб, уларнинг умумий ҳажми 119 трлн сўмни ташкил этган. Шундан 139 020 та юридик шахс томонидан 118,9 трлн сўм, 4 185 та якка тартибдаги тадбиркор томонидан эса 120,7 млрд сўм миқдорида имтиёзлардан фойдаланилган.
Шу билан бирга, 15 346 та ташкилот божхона имтиёзларидан фойдаланган бўлиб, уларнинг умумий қиймати 59,1 трлн сўмни ташкил этган.
Хусусан, давлат аҳамиятига молик лойиҳалар доирасида 12,6 трлн сўм, чет давлатлар ваколатхоналари ва дипломатик агентлари томонидан 345 млрд сўмлик имтиёзлар қўлланилган.
Бундан ташқари, 75 та хорижий юридик шахснинг Ўзбекистондаги доимий муассасалари томонидан 2,46 трлн сўмлик божхона имтиёзларидан фойдаланилгани қайд этилган.
Агентлик маълум қилишича, мазкур йўналишдаги маълумотларнинг белгиланган муддатларда очиқланиши доимий равишда мониторинг қилиб борилади.
