Ўзбекистон илк бор халқаро IPО орқали 600 миллион доллардан ортиқ инвестиция жалб қилди
“Ўзбекистон Республикаси Миллий инвестиция жамғармаси” акциялари Лондон ва Тошкент фонд биржаларида оммавий савдога чиқарилди.
Ўзбекистон тарихида илк бор йирик халқаро акциядорлик битими амалга оширилди. “Ўзбекистон Республикаси Миллий инвестиция жамғармаси” АЖ (UzNIF) акциялари Лондон ва Тошкент фонд биржаларида оммавий савдога чиқарилди.
Мазкур IPО натижасида мамлакат иқтисодиётига қарийб 604 миллион АҚШ доллари миқдорида инвестиция жалб қилинди. Ҳозирги кунда жамғарманинг умумий бозор қиймати 1,95 миллиард доллар атрофида баҳоланмоқда.
Энг муҳим жиҳатлардан бири шундаки, эндиликда маҳаллий ва хорижий инвесторлар Ўзбекистоннинг йирик давлат активларига сармоя киритиш ҳамда иқтисодий ўсишдан бевосита даромад олиш имкониятига эга бўлди. Маҳаллий инвесторлар учун акциялар нархи 4,65 сўм этиб белгиланди, жисмоний шахсларга эса 5 фоизлик имтиёз тақдим этилди.
Шунингдек, “BlackRock”, “Franklin Resources”, “Redwheel” каби йирик халқаро инвестиция компанияларининг иштироки Ўзбекистонга бўлган глобал ишонч ортиб бораётганини кўрсатади.
Ушбу битим мамлакат иқтисодиётининг очиқлиги, шаффофлиги ҳамда жаҳон молия тизимига интеграциялашув жараёнининг муҳим босқичи сифатида қайд этилмоқда.
