Жаҳон чемпиони учун қайғули якун
Ўзилнинг футболчилик фаолиятига назар.
Бир неча кун олдин Месут Ўзил футболчилик фаолиятини якунлаганини эълон қилди. “Реал Мадрид”, “Арсенал” ва Германия терма жамоасининг собиқ ярим ҳимоячиси олти ой ёки бир йил олдин буни эълон қилиши мумкин эди. 34 ёшли футболчи ўзининг ёрқин фаолияти якунида майдондаги ютуқларидан кўра кўпроқ жанжаллари билан ёдда қолди ва кўпчилик уни аллақачон нафақага чиққан деган фикрга ҳам келишганди.
Ўзил спортда ҳавас қилса арзийдиган мартабага эришди. Унинг энг асосий ютуғи Германия терма жамоаси билан 2014 йилги жаҳон чемпионатидаги ғалаба эди. Бундан ташқари, Месут “Реал” Мадрид билан Испания чемпионлиги, кубоги ва суперкубогини, “Арсенал” билан эса уч марта Англия кубоги ва Суперкубогини қўлга киритди. Ҳужумкор ярим ҳимоячи “Вердер” клуби билан ҳам мамлакат кубоги соҳибига айланган.
Ўзил кўплаб индивидуал совринларга эга бўлди. У Чемпионлар лигаси (2010/2011 йилги мавсум), UEFА кубоги, ЖЧ-2010, Евро-2012, Бундеслига ва Премьер-лиганинг энг яхши ассистенти бўлди. У беш марта Германияда йилнинг энг яхши футболчиси деб топилган. Месут ҳақиқий футбол санъаткори сифатида ёдда қолди.
Умуман олганда, унинг фаолиятидаги пасайиш, эҳтимол, немислар учун ҳалокатли бўлган ЖЧ-2018дан сўнг, плеймейкер футбол иттифоқи раҳбарияти ва ОАВни ҳурматсизликда айблаб, терма жамоани тарк этганидан кейин бошлангандир. Юлдуз спортчи ўзига қарши танқидларга чидай олмаганлигини ҳам айтишимиз мумкин.
Футболчи “Арсенал”даги сўнгги мавсумида (2020/2021) Лондон клубидан 8 миллион фунт олган. Бироқ, у умуман ҳеч қандай турнир учун аризага киритилмаган. Месутнинг шартномаси 2021 йилнинг ёзига қадар амалда эди, аммо январь ойида томонлар ўзаро келишувга кўра шартномани бекор қилишди. Шундай қилиб, немис ярим ҳимоячиси эркин агентга айланди. Ва бир неча кундан сўнг у Туркиянинг “Фенербахче” клуби футболчисига айланди. Ўзил Истанбул клубида ўйнаш унинг болаликдаги орзуси эканини тан олди. Ўшанда “Фенербахче” 520 млн евро қарзи билан ёмон молиявий аҳволда эди, аммо шунга қарамай Ўзилга катта маош таклиф қилинди (уч ярим йилга 15 млн евро). Истанбул президенти Али Коч ҳатто Месут билан шартнома имзолаш учун маблағ йиғишни бошлади. У клубнинг ҳар бир мухлисига керакли рақамга 2,20 евролик СМС юборишни сўраб мурожаат қилган ва шу йўл билан 2 миллион еврогача пул йиғишга умид қилган.
Аммо Ўзилнинг мотивацияси етарли эмас эди. У бир неча бор жароҳат олади. Шу тариқа ярим ҳимоячи “Фенербаҳче”да муваффақиятсизликка учради. Дастлабки олти ойда Месут 11 учрашувда атиги битта голли узатмани амалга оширган. Кейинги мавсум ўйин кўрсаткичи бўйича яхшироқ бўлди (26 ўйинда 9+2), аммо Ўзил барибир умидларни оқлай олмади.
2021 йилнинг сентябрида Ўзил “Фенербахче”даги ўрнидан норози бўлгани ва клубини ўзгартирмоқчи эканлиги ҳақида маълумот пайдо бўлган эди. Ўйинларнинг бирида у иккинчи бўлимда заҳирадан майдонга тушмаслигини билгач бош мураббий Витор Перейрага ҳурматсизлик кўрсатади. 2022 йилнинг март ойида эса Месут Перейранинг ўрнига тайинланган Исмоил Картал томонидан жамоадан четлатилади. Бунга сабаб танаффусдаги ўзгариш бўлди. Ярим ҳимоячига эса мураббийнинг даъволари ёқмади.
2022 йилнинг ёзида “Фенербахче”нинг янги бош мураббийи Хорхе Жезус ҳам Ўзил борасида салбий хулосага келди. У немис футболчисининг жамоага керак эмаслигини маълум қилди. Бироқ, Месут ўзининг кетиши мумкинлиги ҳақида ёзган журналистларни шарманда қилди ва у фаолиятининг охиригача севимли клуби “Фенербахче”да ўйнашини айтди. Бир ой ўтгач, у 1+1 схемаси бўйича шартнома имзолаб, эркин агент сифатида Истанбулнинг “Бошакшеҳир” клубига ўтди.
Лекин, Истанбул жамоасига аслида Ўзил керак эмас эди. Аввалига германиялик ярим ҳимоячи формага кириши учун узоқ вақт керак бўлди ва сентябрдан январгача яна бир жароҳатдан даволанди. Месут янги жамоада бор йўғи еттита, асосий таркибда эса атиги иккита ўйинда майдонга тушди. Ўзил учун сўнгги ўйин Туркия чемпионатининг “Кайсериспор”га (0:1) қарши баҳси бўлди. Мухлислар Месутни ўйин савияси пастлиги учун танқид қилишди ва эртаси куни у машғулотларга келмади.
Ўзил ниҳоят вазиятни тушунди ва шартномани бузди. Футболчининг фаолияти бу тарзда якунлангани жуда ачинарли, чунки Месут ёрқин карьерасининг чиройли якунига лойиқ эди.
