Россия Беларусга ядро қуролини жойлаштиради
Путин бу Британиянинг Украинага таркибида уран бўлган снаряд етказиб беришига жавобан амалга оширилаётганини айтган.
Россия Беларусда тактик ядро қуролини жойлаштиради. Бу ҳақда РФ президенти Владимир Путин “Россия 1” каналига берган интервьюсида маълум қилди.
Унинг сўзларига кўра, бу борада Александр Лукашенко билан аллақачон келишув бор. Россия раҳбарининг қайд этишича, бу ядро қуролининг тарқалишига қарши режимнинг бузилишига олиб келмайди.
Бундан ташқари, Москва Минскка тегишли бир неча ҳарбий самолётни тактик ядро бомбаси қўллаши учун қайта жиҳозлагани таъкидланган. Бундан ташқари, Беларусга “Искандер” ракета комплекслари берилган, бу тизимлар ҳам ядро зарядларини олиб юриши мумкин.
Путин Буюк Британия Украинага кам бойитилган уранли снаряд етказиб бериши ортидан ушбу қадам ташланганини айтган.
“Аммо бу ҳодисалар контекстидан ташқарида ҳам Александр Григорьевич Лукашенко анчадан буён Беларусь ҳудудида Россия тактик ядро қуролини жойлаштиришни сўраб келади”, – деб қайд этган у.
