Президент ва бош вазирнинг гапи бир-бирига мос келмаяпти
Исроилда суд ислоҳоти масаласи сиёсий инқирозни келтириб чиқарди.
Исроил президенти Исхаг Герцог ҳукуматни суд тизимини ислоҳ қилишни зудлик билан тўхтатишга чақирди.
“Исроил халқининг бирлиги номидан, масъулият номидан сизни қонунчилик жараёнини (ислоҳотнинг қабул қилиниши) тўхтатишга чақираман”, — деб ёзди давлат раҳбари Twitter'даги саҳифасида.
Президент янги норозилик намойишчилари ва полиция ўртасидаги тўқнашувлар фонида мамлакатдаги ўта кескин ижтимоий-сиёсий вазиятни қайд этди.
"Миллатни чуқур ташвиш қамраб олди. Миллий хавфсизлик, иқтисодиёт, жамият — ҳамма нарса таҳдид остида", — дейди у.
Исроилда 26 март оқшомида бошланган спонтан норозилик намойишларига бош вазир Бенямин Нетаняху томонидан эълон қилинган Мудофаа вазири Ёав Галантнинг истеъфога чиқиши сабаб бўлди. У бир кун аввал шундай қарорга келган, Галант ҳукмрон коалиция томонидан илгари сурилаётган ва мухолифатнинг оммавий норозиликларига сабаб бўлган суд-ҳуқуқ ислоҳотини тўхтатиб туриш тарафдори эканини очиқ айтди.
Ҳукумат мухолифлари фикрича, Олий суд ваколатларини чеклаш ва судьяларни танлашда ижро ҳокимиятига назорат беришни назарда тутувчи ислоҳот Исроил давлатчилигининг демократик асосларини бузади. Нетаняхунинг таъкидлашича, бу ислоҳот ҳокимиятнинг барча тармоқлари ваколатларини мувозанатлаштиради ва мамлакат сиёсий тизимини янада демократик қилади.
