The Guardian: Песков Украина можароси узоқ давом этишидан огоҳлантирди
Путиннинг матбуот котиби зиёфатлардан бирида Россия сиёсий ва маданият элитасига уруш узоққа чўзилишини айтган бўлиши мумкин.
РФ президенти матбуот котиби Дмитрий Песков россиялик маданият ва сиёсий арбобларни уруш узоққа чўзилишидан огоҳлантирди. Бу ҳақда The Guardian мақоласида сўз боради.
Мақолада Владимир Путин РФни Ғарб билан “чексиз урушга қай тариқа тайёрлаётгани” таҳлил қилинган. Нашр манбаларига кўра, Кремль вакили 2022 йил декабри охирида олий мартабали амалдор уйида ташкил этилган кечки овқат вақтида можаро узоқ давом этишини айтган.
“Сиз мени нимадир дейишимни кутяпсиз. Ҳаммаси янада оғирлашади. Бу жуда-жуда узоқ бўлади”, – деган жаноб Песков йиғилганларга.
Қайд этилишича, йиғилганларнинг айримлари тинчлик ва одатий ҳаётга тезроқ қайтишни ўзида акс эттирган қадаҳ сўзларини айтган. Бунга Путиннинг матбуот котиби юқоридаги гаплар билан жавоб берган.
Қайд этилишича, унинг сўзлари меҳмонларнинг кайфиятини бузган. Уларнинг аксарияти хусусий суҳбатларда урушга қарши чиққан.
“Унинг нутқини эшитиш ёқимсиз бўлди. У уруш биз билан узоқ вақт бирга қолишидан ва бунга тайёр бўлишимиз кераклигидан огоҳлантиргани аниқ эди”, – деб фикрлари билан бўлишган The Guardian суҳбатдошларидан бири.
Песков ҳозирча бу хабарларга изоҳ бермади.
