Профессионал боксчиларимиз АҚШда жанг ўтказади

 

Олимпия ўйинлари кумуш медали соҳиби Бектемир Мелиқўзиевни бундан икки йил муқаддам кутилмаган тарзда мағлубиятга учратган мексикалик Габриел Росадо яна ҳамюртимиз билан жанг ўтказади. Ўзбекистон профессионал бокс федерацияси Бектемир Мелиқўзиев — Габриел Росадонинг реванш жанги жорий йил 22 апрель куни АҚШнинг Лас-Вегас шаҳрида ташкил этиладиган бокс оқшомида рўй беришини маълум қилди. Маълумот учун, профессионал бокснинг энг ўрта вазн тоифасида 12 та жанг ўтказиб, 11 тасида ғалабага эришган Мелиқўзиев ягона мағлубиятини айнан Росадодан қабул қилиб олганди. 

 

“Premier Boxing Championship” промоутерлик компанияси томонидан ташкил этилаётган бокс оқшомининг марказий жанги енгил вазн тоифаси вакиллари Жервонта Девис — Раян Гарция ўртасида ўтади.

 

Ҳамюртимиз Бектемир Мелиқўзиев сўнгги жангини жорий йил 29 январь куни америкалик Улисес Серрага қарши ўтказиб, муддатидан аввал зафар қучган. Росадо эса охирги учта жангида рингни боши эгик ҳолатда тарк этган. 

 

Эслатиб ўтамиз, Мелиқўзиев жангига қадар профессионал боксчиларимиздан иккинчи энг енгил вазнда WBА ва IBF йўналишларида жаҳон чемпиони Муроджон Аҳмадалиев ва энг ярим ўрта вазнда жанг олиб бораётган Исроил Мадримов 9 апрель тонгида Сан-Антонио (АҚШ)да рингга кўтарилади. Аҳмадалиев IBF йўналишида филиппинлик Марлон Тапалесга, Мадримов эса америкалик Рафаэл Игбоквега қарши баҳс олиб боради.