Бир чоракда 172 соврин
Бугун – Тараққиёт ва тинчлик йўлида халқаро спорт куни.
Спортни тинчлик элчиси, деб аташ азалдан таомилга айланган. Унинг ёнига тараққиёт тушунчасининг қўшилишида ҳам ўзига хос рамзий маъно бор. Шу боис, жаҳонда 6 апрель Тараққиёт ва тинчлик йўлида халқаро спорт куни сифатида кенг нишонланади. Кейинги йилларда мамлакатимизда спортга эътибор ҳар қачонгидан кучайиб бормоқда. Унинг нафақат жаҳон миқёсида мамлакатимиз нуфузини ошириш, балки кундалик ҳаётимизда соғлом турмуш тарзи сифатидаги ўрни ҳам тобора кенгайиб боряпти.Спортнинг кўплаб турлари бўйича юксак натижаларга эришиляпти.
Буни айни пайтда Республика "Баркамол авлод" болалар мактаблари фаолиятида ҳам яққол кўриш мумкин.
— Айни пайтда "Жисмоний тарбия ва спорт" йўналишида 10 номдаги тўгаракда жами 23 минг 883 нафар ўғил-қиз турли спорт турлари бўйича машғулот олиб боряпти, - дейди Республика “Баркамол авлод” мактаби директори Севара Маҳмудова. — Энг муҳими сўнгги йилларда ўқувчиларимиз спортнинг, айниқса, таэквондо, каратэ, стол тенниси ва мини футбол тури бўйича ҳам халқаро, ҳам мамлакатимиз миқёсида катта ютуқларни қўлга киритяпти. Масалан, шу йилнинг биринчи чорагидаёқ жами 172 нафар, шундан 37 нафар ўқувчиимз халқаро, 135 нафари эса Ўзбекистонда бўлиб ўтган мусобақаларда совринли ўринларни қўлга киритди. Буни, ўз навбатида, мамлакатимизда спортга бўлган эътиборнинг ёрқин натижаси, деб аташ мумкин.
