“Буюк қайтишлар”ни амалга оширган футбол юлдузлари

 

Шу кунларда жаҳон оммавий ахборот воситалари “ПСЖ” ҳужумчиси Лионел Мессининг “Барселона”га қайтиши мумкинлиги ҳақида ёзишмоқда. Кўп ойлардан бери давом этаётган музокаралар шу кунларда яна авжига чиқмоқда. Испан клуби аргентиналик футболчини қайтариш учун барча нарсага тайёр эканлигини айтди. Футбол тарихида бунга ўхшаш камбеклар жуда кўп бўлган. Лекин ҳар доим ҳам ўйинчилар ўзлари муваффақият қозонган клубларига қайтишлари билан юқори савияни кўрсата олишмаган.

 

Криштиану Роналду (“Манчестер Юнайтед”)

 

Роналду Манчестерда катта футбол оламига кириб келди. Ҳамда шу ерда у ўз истеъдодини намойиш қилди. Дунёнинг энг яхши футболчиларидан бири эканлигини кўрсатди. “Олд Траффорд”га қайтиш яхши ва чиройли ҳикояга ўхшарди, чунки бу шунчаки бир пайтлар Криштиану ўйнаган клубга ўтиш эмас, балки уйга қайтиш эди. Аммо кутилмаганда кўп ҳодисилар юз берди. Португалиялик футболчидан қандайдир мўъжизалар кутилган эди. Аммо бунинг ўрнига мухлислар умидсизликка тушиб қолишди. Шундан сўнг келишмовчиликлар ортидан Криш жамоани тарк этди.

 

Шу билан бирга, статистик маълумотларга кўра, Роналду қайтганидан кейинги биринчи мавсумда у биринчи келганидагидан ёмон ўйин кўрсатмаган. Ўша мавсумдаги муаммо жамоанинг умумий натижаларига таъсир кўрсатди. Кейин эса омадсиз даврни ўтказди. 2022/2023 йилги мавсумда, Эрик тен Хаг клубга келганида Роналду билан муносабатлар бузилди. Бу эса Криш ва “Манчестер Юнайтед” ҳикояси қайғули якун топишига олиб келди.

 

Антуан Гризманн (“Атлетико Мадрид”)

 

Француз футболчиси 2014 йилда “Атлетико Мадрид”га келиб қўшилганди. Вақт ўтиши билан у жамоа етакчиси ва тизимли ўйинчига айланган. Антуан учун ҳаммаси ажойиб кетаётганди: голлар, голли паслар, юлдузлик мақоми. Лекин 2018 йилда у жамоасини ўзгартиришни хоҳлади. Гризманн “Барселона”га ўтаётган эди ва бир неча ҳафта давомида ОАВда бу трансфер қачон бўлиб ўтиши ҳақида миш-мишлар тарқалди. Бироқ, Гризманн Мадрид жамоасини билан шартномани 2023 йилгача узайтиришга қарор қилди. Кейин эса яна “Барселона” билан музокарага киришди. Бу достон “ПСЖ”-Мбаппе-“Реал” учбурчагидан ҳам кескинроқ чиқди, чунки “Атлетико” омма олдида “Барса”ни номақбул хатти-ҳаракатларда айблади. Натижада, Гризманн барибир кетди. У Каталония клуби томонидан тўлиқ 120 миллион еврога сотиб олиш варианти билан шартнома имзолади.

 

Француз футболчиси бу ерда янги тажрибага эга бўлди: Гризманн ўзининг конфор зонасини тарк этиб, унга қўйилган умидларни оқламади, чунки у ўзига таниш бўлмаган позицияда тўп сурди. Ҳамда Антуан ақл бовар қилмайдиган бурилиш ясади. У “Атлетико”га ижарага ўтди ва кейин тўлиқ шартнома имзолади. Шунингдек, у мухлислардан узр сўради:

 

“Одамлар мендан буни эшитишни хоҳлашларини биламан: мухлисларга етказган оғриқ учун узр сўрайман. Лекин буни амалга оширишнинг энг яхши йўли - майдонда ўзимнинг энг яхши томонларимни кўрсатиш. Биз тўғри йўлдамиз”.

 

Қайтиш қийин эди. Гризманн биринчи мавсумда “Атлетико”ни тарк этишдан олдинги статистикасига ҳам яқинлаша олмади. Мухлислар уни ҳайратда қолдирди, лекин у таслим бўлмади ва бу мавсумда яна чўққига қайтди. Антуан ҳали олдинги кўрсаткичларга эриша олгани йўқ, лекин мавсум ҳали тугамаган. 

 

Пол Погба (“Ювентус”)

 

Погба Туринга болалигида келган ва катта футболчига айланган ва бир неча мавсумда “Юве” афсоналари рўйхатига киришга муваффақ бўлган. Тўрт бор лига чемпионлиги, муваффақиятли стартлар ва кейин 2012 йилги мавсумда “Манчестер Юнайтед”га тўсатдан ўтиш. Кейин Погба клубдан жанжал билан кетди: Сер Алекс Фергюсон Мино Раёла раҳбариятдан юқори маош талаб қилиб, футболчининг маошини ҳаддан ташқари ошириб юборади, деб ҳисоблади. Томонлар бир-бирини ҳурматсизликда айблади. Орадан кўп йиллар ўтиб “Манчестер Юнайтед” Погбани қайтаришга қарор қилди. Погба Манчестерда олти мавсум қолди, лекин яна жанжал билан кетди. Раҳбарият ва мураббийлар билан бир мавсум келишмовчиликлардан сўнг, у “Манчестер Юнайтед”ни эркин агент сифатида тарк этди ва “Ювентус”га қайтди. 2026 йилгача маошини сезиларли даражада камайтирувчи шартнома имзолади. Чиройли ҳикоя жуда тез якун топди. 2022 йил июль ойи охирида Погба жамоа ўйинида 45 дақиқа ўйнади, кейин машғулотларда тиззасидан жароҳат олди ва деярли етти ойга сафдан чиқди. 29 январь куни у “Монза” билан ўйин учун аризага киритилган. “Торино” билан баҳсда 22 дақиқа ўйнади. Кейин “Рома” билан ўйинда яна 13 дақиқага майдонга тушди. Аммо Погба тўлиқ қайтишга муваффақ бўлмади. Машғулотларда жарима зарбаларини бажариш пайтида у яна жароҳат олди. Миш-мишларга кўра, “Ювентус” у билан шартномани бузишга қарши эмас, чунки бутун мавсум давомида жароҳатдан жароҳатгача ўтадиган футболчини сақлаб туриш жуда қимматга тушади.

 

Ромелу Лукаку (“Интер”)

 

Лукаку “Интер”да яхши фаолият олиб борди. У ерда футболчи Европанинг энг кучли ҳужумчиларидан бири унвонига эга бўлди. Чемпионликни қўлга киритди ва раҳбариятнинг тўлиқ ишончини қозонди. Аммо “Челси” унга таклиф билан чиққанида қаршилик кўрсата олмади. Лондон клуби уч марта музокарага киришди, ҳар сафар футболчининг улушини оширди: худди Ромелуни Лондонда кўришни қанчалик хоҳлаётганини кўрсатгандай.

 

Лукаку болалигидан Лондон клубига мухлислик қилган, шу боис 2011 йилда биринчи шартномасини имзолаганида, у ниҳоятда хурсанд эди. Тўғри, кейин Ромелу унчалик яхши ўйинлар ўтказмади. У икки йил ижарада юрди ва охир-оқибат жамоадан кетди. Шунинг учун “Стамфорд Бриж”га қайтиш кўп йиллар олдин тугалланмаган ишларни якунлашга уринишдек туюлди. Аммо бу иш бермади: Лукаку очиғини айтганда, “Челси”да муваффақиятсизликка учради, шунинг учун “Интер” уни бир мавсумдан кейин яна ижарага олди. Қайтишдан кутилган умидлар ҳар икки томоннинг ҳақиқатига тўғри келмади: Лукаку Лондонга қайтишдан олдинги даражасини бир мунча йўқотди. Бутун мавсум давомида бор-йўғи учта гол ва битта голли узатмага эга бўлган бельгиялик футболчини клуб ижара муддати тугагач, ўз сафида ушлаб турмаслигини аллақачон тасдиқлаган.

 

Уэйн Руни (“Эвертон”)

 

“Эвертон” Рунининг фаолиятида жуда кўп нарсани англатади: айнан ўша ерда у барча тайёргарлик босқичларини босиб ўтди, катта футболда дебют қилди ва авлоднинг асосий истеъдоди сифатида ўзини намоён қилди. Икки йил ўтгач, юқори даражадаги футболчи “Юнайтед”га жўнаб кетди ва у ерда у охир-оқибат афсонага айланди. Аммо Манчестердаги муддати тугагач, Уэйн ҳаммаси бошланган жойга қайтди. Ливерпул жамоасига қайтиш омадли бўлди. Руни сардор этиб тайинланди, у мунтазам равишда майдонга тушди ва ҳатто 10 та гол урди. Ҳозирги вақтда ОАВ “Эвертон” Рунини бош мураббий қилиб қайтаришдан манфаатдор эканлиги ҳақида ёзмоқда. Англиялик собиқ футболчи ҳозир “ДC Юнайтед”га мураббийлик қилмоқда.

 

Златан Ибраҳимович (“Милан”)

 

Ҳужумчи ўз фаолиятида кўплаб клубларни ўзгартирди. Бироқ, у 2019/2020 йилги мавсумда етти йилдан сўнг “Милан”га қайтди. Биринчи босқичда Златан ўзи иштирок этган барча учрашувларда асосий таркибдан майдонга тушди. Кўп гол урди (айниқса, 2011/2012 йилги мавсумда – 28 та гол!) ва чемпионликни қўлга киритишда ҳал қилувчи ролни ўйнади.

 

2019/2020 йилги мавсумда Ибраҳимович қайтди, аммо унинг Милан клубидаги фаолияти иккинчи босқичда омадсизликка учради. 2020 йилда у мушаклари ёрилиши туфайли икки ойни ўтказиб юборди, кузда коронавирус билан касал бўлиб қолди. Кейин мушак жароҳати ва ундан кейин тибиа жароҳати. У эндигина тузалиб кетган эди, 2021 йил февраль ойида яна мушак ёрилиши ва тиззасидаги жароҳат футболчи фаолиятига жиддий таъсир кўрсатди. Златан бутун 2021/2022 йилги мавсумни уколлар билан ўтказди.

 

Терри Анри (“Арсенал”)

 

“Арсенал” афсонаси собиқ клубига 2012 йил бошида қисқа муддатли ижара асосида келган эди. Ўшанда Анри тўп сурган МЛСда вақтинчалик танаффус эълон қилинган эди. Шунинг учун Терри ҳаммасини яна қайтадан бошлаш учун Лондон жамоасига келиб қўшилди. Умуман олганда, франциялик футболчи мавсум давомида 7 та ўйинда майдонга тушди ва икки бор гол урди.