“Бавария” Мане билан хайрлашмоқчи
Футболчи Тухелнинг режаларидан ўрин олмаган.
“Бавария” Садио Манени сотиш ниятида, ҳужумчи бош мураббий Томас Тухелнинг режаларига киритилмаган. Эслатиб ўтамиз, Мюнхен клуби 0:3 ҳисобида мағлуб бўлган “Манчестер Сити”га қарши Чемпионлар Лигаси чоракфиналидан сўнг кийиниш хонасидаги можаро вақтида Мане жамоадоши Лерой Саненинг юзига урган ва унинг лабига жароҳат етказганди.
“Эшитишимча, “Бавария” ёзда Садио Манедан қутулиш учун ҳамма нарсани қилади. Томас Тухелда ҳужумчи бўйича режа йўқ, чунки Садио унинг тизимига тўғри келмайди. Бу — менинг маълумотим. Клуб ичида Манега нисбатан жуда танқидий муносабат бор. Айниқса, унинг йиллик маоши 20 млн евродан юқорилигини ҳисобга олсак, Маненинг трансфери хато деб ҳисобланмоқда. Унинг қониқарсиз ўйини туфайли клубда “Бавария” Мане билан эмас, унинг эгизак укаси билан шартнома имзолади, деган ҳазил бор”, — дейди журналист Флориан Плеттенберг.
