Баҳодир Қурбонов Ҳиндистонда ШҲТ мудофаа вазирлари йиғилишида иштирок этмоқда
Йиғилишда мудофаа вазирлари минтақавий тинчлик ва хавфсизлик, ШҲТ доирасида терроризмга қарши кураш масалаларини муҳокама қилиши режалаштирилган.
Ўзбекистон мудофаа вазири Ҳиндистонда бўлиб ўтаётган Шанхай Ҳамкорлик Ташкилотига (ШҲТ) аъзо давлатлар мудофаа вазирлари йиғилишида иштирок этмоқда. Бу ҳақда вазирлик матбуот хизмати хабар берди.
Ҳиндистон пойтахти Нью-Делида ШҲТ аъзо давлатлар мудофаа вазирларининг йиғилиши бошланди. Унда Ўзбекистон мудофаа вазири генерал-лейтенант Баҳодир Қурбонов ҳам иштирок этмоқда.
Шунингдек, йиғилишда Хитой, Қозоғистон, Қирғизистон, Россия ва Тожикистон мудофаа вазирлари ҳам қатнашмоқда.
Ҳиндистон ШҲТ кузатувчилари мақомида бўлган Беларусь ва Эронни ҳам таклиф этган. Покистон мудофаа вазири йиғилишда онлайн қатнашмоқда.
Йиғилишда мудофаа вазирлари минтақавий тинчлик ва хавфсизлик, ШҲТ доирасида терроризмга қарши кураш масалаларини муҳокама қилиши режалаштирилган.
