Парижликлар жамоада қайта қуриш ишларини бошлайди
Клуб трансфер ойнасида таркибни тиклаш учун 225 миллион евро сарфлашга тайёр.
“ПСЖ” раҳбарияти ёзда жамоани қайта қуриш учун тахминан 225 миллион евро ажратишга тайёр. Бу ҳақда “L'Équipe” нашри хабар берди.
Манбанинг хабарига кўра, ёзда жамоани эркин агент сифатида ҳимоячи Серхио Рамос тарк этади, чунки унинг шартномаси тугайди, яна бир марказий ҳимоячи Преснел Кимпембе ҳам сотилиши мумкин. Парижликлар ўз ўрнида “Нитса”дан Жан-Клер Тодибо ва Монакодан Аксел Дисаси номзодини кўриб чиқмоқда. Шунингдек, Париж клуби “Нитса”даги Кефрен Тюрамга қизиқиш билдирмоқда.
Бундан ташқари, июнь ойида шартномаси тугайдиган Лионел Месси ҳам ёзда жамоани тарк этиши хабар қилинган. Унинг ўрнига бир нечта номзодлар кўриб чиқилмоқда: “Тоттенҳем”дан Ҳарри Кейн, “Наполи”дан Виктор Осимҳен, “Айнтрахт” ҳужумчиси Рандал Коло Муани ва ёзда “Боруссия-М”ни эркин агент сифатида тарк этадиган ҳужумчи Маркус Тюрам.
