Норвегиялик футболчи АПЛда мутлоқ рекорд ўрнатди
У мавсум давомида бешта жамоадан ҳам кўп гол урган.
“Манчестер Сити”нинг норвегиялик ҳужумчиси Эрлинг Ҳоланд АПЛнинг 28-туридан ўрин олган “Вест Ҳем”га қарши ўйинда гол урди. Бу гол норвегиялик футболчи учун жорий мавсумдаги 35-гол бўлди. Шу тариқа, у бир мавсумда урилган голлар сони бўйича Англия чемпионати олий дивизионининг мутлақ рекордини янгилади.
Ҳоланд бир вақтнинг ўзида бешта Премьер-лига жамоасидан кўпроқ гол урган. “Челси”, “Вулверхемптон”, “Ноттингем Форест”, “Эвертон” ва “Саутгемптон” клубларида бир мавсумда урилган голлар сони 35 тадан кам.
Эслатиб ўтамиз, Ҳоланд 1993/1994 йилги мавсумда 40 та ўйинда 34 та гол урган Энди Коул ва 1994/1995 йилги мавсумда 34 та гол урган Алан Ширернинг рекордини янгилади. Норвегиялик футболчи жорий мавсумда 31 та ўйинда майдонга тушди. “Манчестер Сити”нинг мавсум якунига қадар АПЛда яна бешта ўйини бор.
