Роналду “Ал-Наср”ни тарк этадими?

 

Криштиану Роналду Саудия Арабистонини тарк этиши мумкиню “Эл Насионал” нашрининг хабарига кўра, “Ал-Наср” ҳужумчиси мамлакатга мослашишда қийналган. Роналдуга ҳам тил бўйича муаммо пайдо бўлмоқда. Қайд этилишича, португалиялик футболчи 9 йил давомида “Реал”да ўйнаган Мадридга қайтишни истамоқда. Мадрид клуби президенти Флорентино Перес Роналдуга клубга элчи сифатида қайтишни ёки унга жамоанинг спорт бошқарувидаги лавозимни таклиф қилишга тайёр. Криштиану яна қандай сабабларга кўра “Ал-Наср”ни тарк этиши мумкин?

 

Роналдунинг Саудия Арабистонидаги биринчи ойи ажойиб ўтди. Одамлар юлдуз ҳақиқатан ҳам “Ал-Наср”га кўчиб ўтганига ишонишмади. Аммо “асал ойи” тугади. Роналдунинг севгилиси Жоржина Родригес маҳаллий одоб-ахлоқ қонунини бузганликда айбланган. Саудия Арабистони, айниқса, аёллар учун қатъий қоидаларга эга мусулмон мамлакати. Жоржина жамоат жойларида очиқча кийинган.

 

2019 йилда Саудия Арабистонида одоб-ахлоқ қонуни қабул қилинди. Жамоат жойларида тўпиқдан пастда тирсак ва оёқларни қоплайдиган кенг кийим кийиш тавсия этилади. Бу қонунни бузганга молиявий жарима мавжуд. Биринчи марта у 25 еврога тенг. Жоржина қандайдир тарзда жазоланганми? Йўқ, гап оммавий ахборот воситаларидаги шов-шувлардан нарига ўтмаган.

 

Апрель ойи ўрталарида Саудия Арабистони чемпионатининг “Ал-Фейха” билан ўйинидан сўнг (0:0) Роналду рақибга: “Сиз ўйнашни хоҳламайсиз!”, деб бақирди ва рақибларнинг тактикасидан безовта бўлди. Шундан сўнг Криштиану тезда пастки трибуна хонасига йўл олди.

 

Кейин Криштиануни “Ал-Наср” бош мураббий Руди Гарция билан хайрлашишга қарор қилганликда айблашди. Француз мураббийи апрель ойи ўрталарида ишдан бўшатилди. Қайд этилишича, Роналду мутахассис ишидан норози. Португалиялик “Ал-Наср”ни янада юқори савияда ўйнашга қодир, деб ҳисоблашди. Бироқ, Гарция кетганидан сўнг, ҳужумчи ижтимоий тармоқларда французга қилган иши учун миннатдорчилик билдирган постини эълон қилди: “Сиз билан ишлаш жуда ёқимли эди. Келажакда сизга энг яхши тилакларимни тилайман”.

 

Роналдуни “Ал-Ҳилол” билан ўйин (0:2) сўнгида янги муаммо кутиб турарди. Ўйиндан сўнг 38 ёшли португалиялик футболчига рақиб мухлислари “Месси, Месси!” деб бақиришди. Кейинроқ саудиялик адвокат Нуф бин Аҳмед Роналдуни номақбул хатти-ҳаракатларда айблаб, прокуратурага даъво аризаси берганини айтди.

 

“Бу жамоат тартибини бузиш жинояти ҳисобланади ва у хорижлик томонидан содир этилган бўлса, ҳибсга олиниши ва депортация қилиниши мумкин”, деди адвокат. Бироқ, бу иш ҳеч қандай натижа бермади ва Роналду жазоланмади, депортация ҳам қилинмади.

 

Аммо бир неча кундан кейин жанжал туфайли Криштиану номи яна янгиликларда пайдо бўлди. Роналду Саудия Арабистони кубоги ярим финалида “Ал-Ваҳда”га қарши ўйиннинг биринчи ярмидан сўнг мураббийлар штаби билан тўқнаш келди. Майдонни тарк этаркан, португалиялик мураббийлари ҳақида ранжиган гаплар айтди. Натижада “Ал-Наср” 0:1 ҳисобида имкониятни бой берди. Шу билан бир қаторда, ОАВ Роналдунинг севгилисидан ажралиши мумкинлиги ҳақидаги маълумотларни муҳокама қилди. Таъкидланишича, у жуда кўп пул сарфлайди ва кўп вақтини савдо марказларида ўтказади. Бироқ Роналду ижтимоий тармоқлардаги бу миш-мишларни рад этди.

 

Саудия Арабистонида беш ой ичида Криштиану аллақачон бир нечта нохуш вазиятларга тушиб қолди. Португалияликни дунёнинг энг кўп маош олувчи футболчисига айлантирган (йилига 200 миллион евро) “Ал-Наср” футболчидан воз кечадими? Ҳамда у “Реал Мадрид”даги иш учун футболдан воз кечишга тайёрми? Афсонавий футболчининг фаолияти шу қадар ачинарли якунланишини тасаввур қилиш қийин.