“Арсенал” Венгерни сўнгги ўйинга таклиф қилмоқчи
Ушбу таклиф жамоа чемпионлик имкониятини сақлаб қолсагина юборилади.
Лондоннинг “Арсенал” жамоаси собиқ бош мураббийи Арсен Венгерни “Вулверхемптон”га қарши ўйинга таклиф қилишни режалаштирмоқда. Бу ҳақда “Даилй Маил” нашри хабар бермоқда.
Манбага кўра, “канонирлар”нинг собиқ бош мураббийига таклиф фақат “Арсенал” ушбу ўйин бошланишига қадар АПЛ чемпионлиги учун курашни давом эттирса юборилади.
Охирги марта Венгер 2022 йилнинг декабрь ойида “Арсенал”нинг “Вест Хем”га қарши ўйинига ташриф буюрган эди. Лондонликлар 28 май куни 38-турда “Вулверхемптон”га қарши ўйнайди.
Эслатиб ўтамиз, “Арсенал” Премьер-лигада 35 ўйиндан сўнг 81 очко билан иккинчи ўринда бормоқда. Жамоа пешқадам “Манчестер Сити”дан бир очко ортда қолмоқда, аммо “шаҳарликлар” ҳисобида битта ортиқча ўйин бор.
