Швеция: “Вагнер” ЕИда террорчилик ташкилоти деб топилиши керак!
Бу ҳақда мамлакат ташқи ишлар вазири Тобиас Биллстрём маълум қилди.
Унинг сўзларига кўра, Стокголм мазкур масала бўйича Европа Иттифоқи давлатлари билан муросага келиши керак.
Биллстрёмнинг қайд этишича, “Вагнер гуруҳи” Судан, Мали, Сурия ва Украинада даҳшатли ҳужумларни амалга оширган. Айни вақтда Швеция ротация бўйича Европа Иттифоқи Кенгаши раиси лавозимини эгаллаб турибди. 12-май куни Стокголмда Европа Иттифоқига аъзо 27 давлатнинг ташқи ишлар вазирларининг учрашуви ўтказилади.
Вазирнинг айтишича, бирор-бир ташкилот террорчиликка алоқадор дея топилиши учун миллий ҳуқуқ-тартибот идоралари унга қарши тегишли моддалар билан иш қўзғатиши лозим. Дастлабки тергов ўтказилганидан кейингина масала Европа Иттифоқи кенгашининг ташқи ишлари муҳокамасига киритилади.
10-май куни Франсия Миллий йиғини мамлакат ҳукуматини “Вагнер” хусусий ҳарбий компанияси Евроиттифоқда террорчилик ташкилоти рўйхатига киритишга чақириш бўйича “бор дипломатик саъй-ҳаракатини” ишга солувчи резолюцияни қабул қилди. Литва парламенти бу каби резолюцияни мартда тасдиқлаганди. Буюк Британия ҳам шу каби ниятда. Европанинг террорчилик ташкилотлари рўйхатида ҳозирда 13 та жисмоний ва 21 та юридик шахс мавжуд.
“Вагнер” қандай гуруҳ?
Кўплаб Ғарб ОАВлари “Вагнер” гуруҳи тўғридан тўғри Владимир Путинга бўйсунишини ёзади. Унинг ёлланма жангчилари болаларни ўлдириш, аёлларни зўрлаш ва қийноққа солиш, шунингдек, шафқациз қотилликларда айбланиб келади.
“Конкорд” компанияси эгаси бўлган Евгений Пригожин 2016-йилдан буён АҚШ, 2020-йилдан буён эса Евроиттифоқ санкциялари остидадир. Вашингтонда у Интернет тадқиқотлари агентлиги (троллар фабрикаси) ва “Вагнер”ни назорат қилишда айбланган.
У “Вагнер”га алоқадорлигини кўп марта рад этган ва бундай айбловлар сабабли судлашган, аммо 2022-йил сентябрида у “Вагнер” асосчиси эканини маълум қилди. Ташкилотни 2014-йилда, унинг сўзларига кўра, “Донбассда рус халқига нисбатан геноцид” бошланган вақтда тузган.
