Аргентинадаги мундиалнинг иккинчи тур ўйинлари старт олди

 

Кеча турнир мезбони U-20 жаҳон чемпионатида иккинчи ғалабасини қўлга киритди. «А» гуруҳи 2-тур учрашувида улар Гватемалани 3:0 ҳисобида мағлуб этишди. Алехо Велис, Лука Ромеро ва Максимо Перроне алоҳида ажралиб турди.

 

Ушбу ғалаба эвазига Аргентина муддатидан олдин олти очко билан плей-офф йўлланмасини қўлга киритди. Ундан кейин «А» гуруҳида Янги Зеландия тўрт очко билан, Ўзбекистон битта ва Гватемала 0 очко билан бормоқда.

 

«Б» гуруҳи баҳсида Эквадор Словакия устидан иродали ғалабага эришди. Европа терма жамоаси Мате Сзолгайнинг саъй-ҳаракатлари эвазига ҳисобни очганди. Аммо кейин Жастин Куэро ва Хосе Клингернинг голлари жанубий америкаликларга ғалаба келтирди. «Б» гуруҳини олти очко билан АҚШ жамоаси бошқармоқда. Словакия ва Эквадорда учтадан очко бор, аммо тўплар нисбати яхшироқ бўлгани учун Европа жамоаси юқорироқда. Фижи жадвални ноль очко билан якунлаб турибди.

 

Бугун «С» ва «Д» гуруҳларидаги баҳслар доирасида Сенегал - Исроил, Италия - Нигерия учрашувлари ўтказилади. 25 май куни эса Бразилия-Доминикан Республикаси ва Япония-Колумбия ўйинлари бўлиб ўтади.