Ўсмирларда овоз дағаллашиши жиддий касаллик аломатими?
Бу бўйича мутахассис маълумот берди.
Балоғат пайти ҳеч қандай шамоллаш ёки томоқ оғриғи бўлмаса-да кўпчилик ўғил-қизларда овоз дағаллашиши кузатилади. Хўш, бундай ўзгаришнинг сабаби нима?
Тиббиёт фанлари номзоди Насиба Алимованинг маълумот беришича, ўсмирлик даврида организмда турли гормонал ўзгаришлар содир бўлади. Гормонлар ўғил-қизларнинг нормал ўсиши ва тананинг ривожланишида муҳим ўрин тутиб, бу – эндокрин тизимнинг меъёрда ишлашини талаб этади.
Бироқ ўсмирликда гормонларнинг секретор мароми бузилиб, улар кўпайиши мумкин. Ушбу ҳолат баъзида овоз дағаллашишига сабаб бўлади. Аммо бу вақтинчалик ҳолат.
Борди-ю овоз йўғонлашиши қалқонсимон без касалликлари овоз пайчаларининг зарарланиши билан боғлиқ бўлса, тиббий текширувдан ўтиш талаб этилади.
Бунинг учун эндокринолог-шифокор маслаҳати зарур. Ушбу мутахассис қалқонсимон безнинг УТТ текшируви билан бирга, гормонлар таҳлили (ТТГ эркин Т4)дан сўнг беморга керакли даво муолажаларини тайинлайди.
