Модрич «Реал»ни тарк этишни истаётганини айтди
Саудия Арабистонидан унга 120 миллион евролик таклиф тушмоқда.
«Реал Мадрид» ярим ҳимоячиси Лука Модрич клуб раҳбариятига жамоани тарк этиб, Саудия Арабистони клубига ўтишни истаётганини айтди. Бу ҳақда «ОК Диарио» нашри хабар бермоқда.
Манбага кўра, хорватиялик футболчи Саудия Арабистонидан фойдали таклиф олган. Гап уч мавсум учун 120 миллион евро ҳақида кетмоқда. 37 ёшли Модричга бундай суммани тўлашга тайёрлигини билдирган клуб номи айтилмаган. Қайд этилишича, Лука «Реал» раҳбариятини клубдан кетиш истаги ҳақида хабардор қилган.
Лука Модричнинг «Реал» билан амалдаги шартномаси шу йилнинг июнь ойи охирида тугайди. Аввалроқ томонлар келишувни яна бир йилга узайтириш бўйича келишиб олгани маълум қилинганди.
Ярим ҳимоячи жорий мавсумда «Реал» сафида барча турнирлар доирасида 51 та ўйинда майдонга тушиб, 6 та гол урди ва 6 та голли узатмани амалга оширди.
