Кўп миқдордаги олтин ва ёқут тошларни сотмоқчи бўлганлар қўлга олинди

 

Давлат хавфсизлик хизматининг Навоий ва Самарқанд вилоятлари бўйича бошқармалари ходимлари томонидан Бош прокуратура ҳузуридаги Департаментнинг ҳудудий бошқармаси билан ҳамкорликда Булунғур туманида тезкор тадбирлар ўтказилди.

 

Унда Тошкент шаҳри томон ҳаракатланаётган, Хатирчи туманида яшовчи, 1983 йилда туғилган фуқаро бошқарувидаги Nexia тўхтатилиб, кўздан кечирилганда унинг салон қисмида умумий оғирлиги 1 килограмм 75 грамм бўлган 11 дона бўлакдаги олтин борлиги аниқланиб, просессуал тартибда расмийлаштириб олинди.

 

Мутахассисларнинг баҳолашича, ушбу 999 пробали олтиннинг қиймати 795 млн сўмни ташкил этади.

 

Шунингдек, бошқа ҳолатда эса Тошкент шаҳрида ўтказилган тадбирда, 1968 йилда туғилган шахс соф оғирлиги 838 грамм бўлган ёқут қимматбаҳо тошни 300 минг АҚШ долларига сотишга келишиб, ушбу суммадан 80 минг АҚШ долларини олган вақтида ашёвий далиллар билан ушланди. Тезкор суриштирув ҳаракатлари давомида, у мазкур қимматбаҳо тошни 1960 йилда туғилган фуқародан олганлиги аниқланиб, кўрилган чора-тадбирлар натижасида у ҳам ушланди. 

 

Мутахассисларнинг баҳолашича, ушбу қимматбаҳо тошнинг нархи 477 млн 256 минг сўмни ташкил этади. Қайд этилишича, ҳар икки фуқаро ҳам муқаддам фирибгарлик билан боғлиқ жиноятлари учун судланган.
 

Ҳозирда ҳар икки ҳолат юзасидан мазкур шахсларга ва бошқаларга нисбатан Жиноят кодексининг 177-моддаси 4-қисми «а» банди билан жиноят ишлари қўзғатилиб, тергов ҳаракатлари олиб борилмоқда.