Беҳаё рақсга тушган қизлар иши судда кўрилади
Самарқаддаги чўмилиш ҳавзасининг очилиш маросимида фуқаролар жамоат жойида юриш-туриш қоидаларига амал қилмагани аниқланди.
Жорий йилнинг 16 июнь куни Самарқанд тумани “Янгиариқ” маҳалласида жойлашган чўмилиш ҳавзасининг очилиш маросимида Самарқанд туман “Кулба” маҳалласида яшовчи фуқаро Д.Насимов оммавий тадбирларни ўтказиш қоидасини қўпол равишда бузиб, 2000 га яқин фуқаролар иштирокида оммавий тадбир уюштирган.
Вилоят ИИБ матбуот хизматининг маълум қилишича, тадбирда бир гуруҳ раққоса қизларнинг ярим яланғоч ҳолатдаги беҳаё ўйинлари, жамоат жойида юриш-туриш қоидаларига амал қилинмаганлиги аниқланди.
«Ҳолат юзасидани тадбир ташкилотчисига нисбатан ҳужжатлар расмийлаштирилиб, қонуний қарор қабул қилиш учун ЖИБ Самарқанд туман судига юборилди.
Тадбирда беҳаё ўйинлар кўрсатган раққосалар тери-таносил касалликлари кўригидан ўтказилиб, ОИТС ва ОИВ га текшириш учун қон таҳлиллари олиниб, улар билан тушунтириш ишлари олиб борилди», — дейилади хабарда.
