Махачқалъада портлаш ва ёнғин: 27 киши ҳалок бўлди
70 га яқин одам жабрланган. Улар орасида аҳволи ўта оғир беморлар ҳам борлиги айтилмоқда.
Россия таркибига кирувчи Доғистон Республикаси пойтахти Махачқалъада 15 августга ўтар кечаси “Глобус” савдо маркази яқинидаги автосервис биносида кучли портлаш содир бўлди, деб хабар бермоқда шаҳар маъмурияти.
Шот Telegram каналига кўра, портлашдан сўнг ёнғин бошланган ва олов ёнилғи қуйиш шохобчасига ҳам ўтган. Шу билан бирга, Доғистон раҳбари Сергей Меликов портлаш дастлаб Махачқалъа чеккасидаги ёнилғи қуйиш шохобчаларидан бирида содир бўлгани ҳақида ёзди.
Сўнгги маълумотларга кўра, портлаш оқибатида 27 киши ҳалок бўлган, улардан уч нафари болалар. База Telegram канали воқеа оқибатида 50 дан ортиқ киши жароҳатланганини ёзди, Шот маълумотларида ярадорлар 70 га яқин одам экани айтилди.
Маш канали хабарига кўра, ёнилғи қуйиш шохобчасидан чиққан ёнғин яқин атрофдаги уйларга ҳам ўтган. Аҳоли зудлик билан эвакуация қилинган.
Ҳозирги вақтга келиб ёнғин ўчирилган, Россия Фавқулодда вазиятлар вазирлиги воқеа жойида ҳудудни тозалаш ишларини олиб бормоқда.
Маҳаллий ҳокимият маълумотларига кўра, жабрланганларнинг бир қисми кейин бошқа тиббиёт муассасаларига ўтказилган. Фавқулодда вазиятлар вазирлиги аҳволи ўта оғир беморларни Москвага олиб бориш учун Махачқалъага махсус самолёт юборди.
Доғистон прокуратураси ҳодиса юзасидан текширув бошлаган, портлаш юз берган туманда газ таъминоти узиб қўйилган. Меликов портлашда ҳалок бўлганлар ва жароҳатланганларнинг оилаларига товон пули тўлашга ваъда берди.
