Сайёра иқлимини сақлаб қолиш учун 275 триллион доллар керак
Инвесторлар гуруҳи ҳозирда атиги 11 триллион долларлик активларга эга, холос. Бу экологик мақсадларга эришиш учун зарур бўлган маблағдан 25 баравар кам.
Bloomberg нашрига кўра, бир гуруҳ институционал инвесторлар етакчи давлатларни иқлимни сақлаб қолиш ва 2050 йилгача яшил энергияга ўтишга эришиш учун жами 275 триллион доллар сармоя жалб қилишга чақирди.
Инвесторлар гуруҳи ҳозирда атиги 11 триллион долларлик активларга эга, холос. Бу экологик мақсадларга эришиш учун зарур бўлган маблағдан 25 баравар кам.
Қазиб олинадиган ёқилғига қарамликни бартараф этиш ва кам углеродли келажакка ўтиш учун катта инвестициялар керак. Мутахассислар қайта тикланадиган энергия манбаларига ўтиш учун миллий ҳукуматлар қатъий ва аниқ позиция ишлаб чиқиши кераклигини айтмоқда.
Халқаро иқлимшунослар гуруҳи томонидан олиб борилган тадқиқотлардан маълум бўлишича, 77 йилдан кейин глобал исиш туфайли абадий музликлар улуши 93 фоизга қисқариши мумкин. Бундай сценарийни амалга ошиши эса одамлар ҳаёти ва инфратузилмаларга жиддий хавф солади.
