Ўзбекистоннинг олтин-валюта захиралари яна 1,65 млрд долларга камайди
Захиралар кетма-кет олтинчи ой (апрель ойидан бери) пасайиб бормоқда.
Марказий банк маълумотларига кўра, 1 октябрь ҳолатига кўра, Ўзбекистоннинг расмий захира активлари сентябрь ойида 1,65 миллиард долларга камайган ҳолда 31,04 миллиард долларни ташкил қилди. Бу 2020 йил 1 апрелдан бери энг паст кўрсаткич бўлиб, ўшанда захиралар 31,27 миллиард долларни ташкил қилган.
Захиралар кетма-кет олтинчи ой (апрель ойидан бери) пасайиб бормоқда ва йил бошидан буён мамлакатнинг "молиявий хавфсизлик ёстиғи" 4,73 миллиард долларга камайди.
Ўтган ойда халқаро валюта захиралари 1,3 миллиард долларга (-15 фоизга) қисқариб, 7,39 миллиард долларни ташкил қилди. Кўрсаткич 2013 йилдан бери статистиканинг бутун даври учун антирекордни янгилашда давом этмоқда. Йил бошидан буён валюта захиралари 4,25 миллиард долларга камайди.
